Abazi-Kurtit: Keni pranuar “Zajednicën”, këtu ndahen rrugët tona
Lexohet për: 3 min.
1 vit më parë
Linku u kopjua
Deputeti i Lëvizjes Vetëvendosje, Haki Abazi, i cili ditë më parë është shkarkuar nga Komisioni për Punë të Jashtme dhe Diasporë, sot, ka deklaruar se i ka ndarë rrugët përfundimisht me kryeministrin Albin Kurtin.
Abazi ka akuzuar kryeministrin Kurti se e ka pranuar themelimin e “Zajednicës”.
“Po z. Kurti, këtu ndahen rrugët tona përfundimisht. Ti ke vazhduar në rrugën e njejtë me ata që janë opozitë- konfidenciale . Edhe ata flisnin për “fshisa kur pyeteshin për lisa”. Ju keni pranuar Zajednicën dhe jeni deklaruar në mënyrën më të pasinqertë! As autentike, as semantike por hipokrizi par-excellence. Së paku do e thoje hapur e në sy që e ke pranuar ose ta refuzoje me qartësi! Ju jeni dakorduar me marrëveshjen kornizë që ka dy elemente fundosëse për Kosovën. Një, konzervimi i rolit specifik të Kishës Serbe kundrejt komuniteteve tjera fetare dhe dy, asociacionit apo zajednices së komunave me shumicë Serbe. Dmth z. Kurti ju jeni vazhdimësia e së kaluarës, ju nuk jeni ndryshimi. Luftën për të eliminuar njerëzit potencial për të udhëhequr me vendin ata e bënë me tyten e pushkës dhe revolës duke i dërguar në varr.”, ka shkruar ai në Facebook.
Abazi ka shkruar se Kurti ka adoptuar “luftën speciale, ushtrinë e facebook dhe rrjetet sociale për të eliminuar, këdo që nuk i nënshtrohet liderit suprem”.
“E ke rrethuar veten me njerëzit e pushteteve të kaluara, me vepra penale, nënshkrues të demarkacionit dhe marrëveshjeve të vitit 2013 dhe 2015. Ke përjashtuar aktivisitët dhe përkrahësit më të devotshëm dhe po i mbronë e po i mbanë afër njerëzit e korruptuar, ata që e shkatërruan urbanizmin, privatizuan e përfituan, dhanë leje për kompensim me villa.”, ka shkruar ai.
Abazi ka akuzuar Kurtin, se dështimi në zgjedhjet lokale është fatura e tij e papaguar!
“Në të ashtuquajtura zgjedhje të brendshme ju keni treguar qëllimin përfundimtar, ata që kanë kurriz e integritet gjejeni formën për t‘i lënë jashtë me çdo kusht qoftë edhe duke u kujdesur që personalisht të caktoni diagnosa për të anatemuar dhe stigmatizuar e më pastaj me profilet e ushtrisë fiktive online të shkatërrohen politikisht. Kokat e turkut të janë dashur për të mbuluar dështimin. Kjo mund të bëhet nga një mendje e korruptuar me fajllat e komunistëve. Servilët janë në rregull- Kadri Hazbiu, Beqir Balluku… Jo.”, ka shkruar tutje ai.
Ndër të tjera, deputeti Abazi ka shkruar se i vjen mirë që nuk është pjesë e Komisionit për Punë të Jashtme dhe Diasporë.
“Për drejtësi e pamë, shkarkimi i vetëm ishte për shkak të mendimit dhe kritikës, asnjë shkarkim për mospunë dështimet dhe korrupcionin. Më vjen mirë që nuk jam pjesë e Komisionit që do të duhej t’i mbante tupanin e hipokrizisë për vallën e servilëve dhe pakurrizorëve! Vazhdojmë kur të lodhen zhurmat!”, ka shtuar tutje ai.
