Dyzet persona supozohen të vdekur pasi një varkë pasagjerësh u përmbys në një liqen në provincën jugore Kivu të Republikës Demokratike të Kongos, tha të mërkurën një zyrtar i lartë, i cili shtoi se 10 persona janë shpëtuar deri më tani dhe pesë trupa janë gjetur që nga incidenti i së dielës.

Shpresat e familjeve për gjetjen e të mbijetuarve u zbehën ndërsa përpjekjet e kërkimit hynë në ditën e tyre të tretë të mërkurën, pas përmbysjes së varkës në liqenin Kivu në territorin Idjwi në provincën Kivu Jugor të dielën në mbrëmje.

Varka prej druri, e cila po kalonte liqenin Kivu nga Bukavu në territorin e Idjwi me rreth 50 pasagjerë në bord, u mbyt për shkak të një dallge të fortë, u tha gazetarëve të martën Mustafa Mamboleo, një zyrtar i provincës Kivu Jugore në qytetin Idjwi.

Ai shtoi se aksidenti mund të jetë shkaktuar nga mbingarkesa, pasi varka po transportonte edhe mallra.

"Pas incidentit, marinsat gjetën trupin e kapitenit të varkës të hënën në mbrëmje dhe një tjetër trup i një gruaje u gjet të martën," tha për Anadolu të mërkurën përmes telefonit Ngongo Chishibanji, një oficer detar në Kivunë e Jugut.

Tre trupa u zbuluan në të njëjtën ditë me incidentin, shtoi ai.

Duke vënë në dukje se 10 persona janë shpëtuar deri më tani, Chishibanji tha se përpjekjet e kërkimit janë ende në vazhdim për rreth 35 persona të zhdukur, "ndonëse gjasat për të gjetur të mbijetuar janë të vështira tani".

Një grua që ia dha emrin vetëm si Maombe u tha gazetarëve se shpresat e saj për të gjetur mbesën e saj 23-vjeçare, Alice, e cila ishte një nga pasagjerët, janë zbehur me kalimin e kohës.

Transporti ujor është i zakonshëm në Kongo për shkak të rrugëve kryesisht të pakalueshme. Aksidenti ndodhi pothuajse një muaj pasi 22 persona humbën jetën në liqenin Mai-Ndombe. /AA