Ekipi U19 i FC 2 Korrikut vazhdon të shkëlqejë në arenën evropiane qysh në debutimin e tij në UEFA Youth League. Pasi eliminoi Bylisin, skuadra nga kryeqyteti, të mërkurën, në stadiumin “Fadil Vokrri” në Prishtinë, arriti të fitojë me përmbysje të rezultatit ndaj kampionëve të Irlandës, UCD AFC nga Dublini, duke siguruar një fitore shpresëdhënëse, 2-1.

Nën drejtimin e trajnerit Labinot Haziri, djemtë e kryeqytetit treguan talent të jashtëzakonshëm dhe luftuan deri në fund, duke kthyer rezultatin pas disavantazhit të hershëm. Pasi UCD kaloi në epërsi me golin e Roy Laëlor në minutën e 30-të, FC 2 Korriku reagoi fuqishëm. Lis Berisha, hero i ndeshjes, realizoi dy herë, në minutën e 42-të dhe 59-të, për t’i dhuruar skuadrës së tij një fitore të rëndësishme.

Presidenti i FFK-së, Agim Ademi, përmes një postimi në rrjetet sociale ka përgëzuar lojtarët dhe stafin e FC 2 Korrikut për këtë sukses të rëndësishëm, duke shprehur besimin e tij se skuadra do të menaxhojë me maturi ndeshjen e kthimit në Irlandë dhe do të avancojë në fazën e tretë të kësaj gare.

Ndeshja e kthimit zhvillohet më 6 nëntor, në Dublin, në orën 20:00.