Një 12-vjeçar është bërë personi më i ri i akuzuar për trazirat që shpërthyen pas vrasjes së tri vajzave në qytetin britanik të Southport.

Djali, emri i të cilit nuk është bërë i ditur për shkak të moshës së tij, akuzohet se ka marrë pjesë në trazirat e dhunshme në qytetin Merseyside më 30 korrik, raporton Sky News.

Djali nga Southport do të paraqitet në Gjykatën e Rinisë së Merseyside. Të bashkakuzuar me të janë Harvey Gabbott, 21-vjeç, nga Tarleton, dhe Paul Dryhurst, 33, nga Litherland, dhe do të paraqiten në Gjykatën e Magjistraturës së Liverpoolit.

Gjithsej 30 persona janë akuzuar deri më tani për trazirat në Southport dhe Liverpool.

12-vjeçari akuzohet se gjatë trazirave jashtë hotelit Holiday Inn ku po qëndrojnë azilkërkuesit, ka sulmuar një autobus dhe ka gjuajtur me gur një të ri tjetër.

Më 3 gusht, policia e regjistroi atë duke thyer me këmbë xhamin e një dyqani dhe duke hedhur sende në drejtim të policisë.

Deri të dielën, policia kishte arrestuar 927 persona në Britaninë e Madhe dhe kishte akuzuar 466 prej tyre. Një zëdhënës i kryeministrit Keir Starmer tha se qeveria nuk do të ndalej derisa të përfundonte puna.

Tashmë janë shqiptuar dënime të rrepta me burg për disa të pandehur, përfshirë edhe për postimet në Facebook, ku ata bënin thirrje për dhunë. Leximi i vendimeve shpesh transmetohet në televizion sepse qeveria beson se kjo do t'i pengojë qytetarët nga dhuna.

Ministrja e Drejtësisë Shabana Mahmood tha se sistemi gjyqësor do t'i ndjejë pasojat e trazirave disaditore për muaj e vite, duke pasur parasysh se që nga pandemia burgjet janë mbushur plot dhe gjykatat janë të mbingarkuara.