Për të shënuar 1 Majin – Ditën Ndërkombëtare të Punëtorëve, qytetarë të shumtë edhe këtë vit e kishin destinacion parkun e Gërmisë. Shumë qytetarë, festën e 1 Majit e shfrytëzojnë si ditë pushimi dhe relaksimi, por një pjesë e vogël e tyre kërkuan të drejta më shumë për punëtorët.

Sipas qytetarit Gëzim Kryeziu, shkeljet e të drejtave të punëtorëve në Kosovë ndaj punëtorëve janë të mëdha duke u nisur nga mos sigurimi shëndetësor e deri tek kontributet pensionale. Ai vë në dukje edhe ikjen e shumë të rinjve jashtë shtetit dhe kërkon vetëdijesim nga punëdhënësit për kushte më të mira ndaj punëtorit.

Po ashtu edhe Shefket Lakna nga Prishtina, mendon se pagat, mosrespektimi i orarit të punës  dhe oraret e tej zgjatura janë ndër problemet kryesore me të cilat përballen punëtorët në Kosovë.

Gjithashtu edhe qytetari Enver Makolli si person i punësuar, ka dhënë kërkesën e tij që të krijohet një ambient më i mirë për punë me më shumë të drejta për punëtorët.

Ngjashëm ka mendim edhe Amir Xhemshiti, i cili e ka cilësuar punën të cilën e bëjnë punëtorët në Kosovë si luftë për mbijetesë.

Ndërsa Shemsi Gashi ka bërë një krahasim të kohës së tashme duke cilësuar se në të kaluarën punëtorët janë trajtuar në mënyrë më të dinjitetshme, ndërsa tani sipas tij, ata nga pronarët e tyre konsiderohen si robër.

“Drejtat e punëtorëve janë duke u shkelur shumë, kurrë s’kanë qenë kështu, as në kohën e përparshme nuk kanë qenë kështu me u shkel të drejtat e punëtorëve, punëtori sot punon sikur rob”, ka përfunduar Gashi.

Sot në Kosovë për 1 Maj, janë mbajtur disa protesta nga sindikatat me anë të cilave kërkohet ndërgjegjësim për të drejtat e punëtorëve. F. Pelaj

https://kosovapress.com/qindra-punetore-i-bashkohen-marshit-te-sbashk-ut-kerkohet-dialog-social