Trajneri i Egjiptit, Hossam Hassan, ka theksuar se skuadra e tij do të përballet pa frikë me kampionin në fuqi të botës, Argjentinën, në ndeshjen e 1/8 së finales së Kupës së Botës që zhvillohet sot në Atlanta.

Pavarësisht se e pranoi se Argjentina hyn në këtë përballje si favorite, Hassan insistoi se lojtarët e tij nuk do të ndikohen nga emrat e mëdhenj në radhët e kundërshtarit, përfshirë kapitenin Lionel Messi, por do të përqendrohen te mënyra e tyre e lojës.

“Po të bëhej një sondazh tani se kush do ta fitonte ndeshjen e nesërme, të gjithë e dimë se shumica do të ishin në anën e Argjentinës, pasi përballemi me një nga gjigantët e futbollit botëror. Por në kampin e Egjiptit kemi një bindje tjetër dhe do t’i përgjigjeshim ndryshe atij sondazhi. Ndeshja e nesërme nuk do të jetë e lehtë për ne, por nuk do të jetë e lehtë as për ta. Ne kemi respekt të madh për Argjentinën, por kemi një objektiv dhe synojmë ta realizojmë”, ka thënë Hassan, sipas FIFA-s.

Egjipti vjen në fazën me eliminim direkt pa humbje në katër ndeshje në këtë turne, ndërsa Hassan beson se kjo seri i ka përgatitur lojtarët e tij për sfidën më të madhe deri tani.

“Jemi gati për ndeshjen. Si mund të mos jemi? Jemi në 1/8 e finales së Kupës së Botës kundër kampionëve të botës dhe lojtarëve legjendarë si Lionel Messi. Po, e respektojmë Argjentinën, por nuk i frikësohemi askujt, sepse vuani nëse kaloni shumë kohë duke menduar për kundërshtarin”, deklaroi trajneri egjiptian.

Ish-sulmuesi ka treguar se që nga marrja e drejtimit të kombëtares egjiptiane, fokusi i tij ka qenë që lojtarët të besojnë në cilësitë e tyre dhe të mos ndikohen nga reputacioni i kundërshtarëve.

“Që kur kam marrë drejtimin e Egjiptit, jam përpjekur t’i bëj lojtarët të përqendrohen te vetja, te stili ynë i lojës dhe mënyra se si ta imponojmë atë në fushë. Kemi punuar që të bëjmë gjërat sipas mënyrës sonë, pa u shqetësuar për reputacionin e një vendi apo emrat në fanellat e tyre”, tha Hassan.

Duke kujtuar përballjen e fundit miqësore me Brazilin, ai theksoi se qasja e skuadrës do të jetë e njëjtë edhe ndaj Argjentinës.

“E respektuam jashtëzakonisht shumë Brazilin, por nuk u menduam tepër për të. Prandaj do të vazhdojmë me mënyrën tonë të lojës”, u shpreh ai.

Hassan theksoi gjithashtu se Egjipti po luan jo vetëm për tifozët e vet, por edhe për të gjithë adhuruesit e futbollit në Afrikë dhe botën arabe, duke kërkuar një kualifikim historik në çerekfinale.

“Ne kemi një objektiv të madh në këtë ndeshje, një objektiv që ndahet jo vetëm nga tifozët egjiptianë, por edhe nga të gjithë njerëzit arabë dhe afrikanë, sepse ne po i përfaqësojmë të gjithë këtu. Duhet të tregojmë zhvillimin e futbollit egjiptian në fushë, si në aspektin taktik, ashtu edhe në karakter dhe vendosmëri për të arritur raundin tjetër”, tha trajneri.

Ai e cilësoi Kupën e Botës si kulmin e karrierës së çdo futbollisti dhe kërkoi nga lojtarët e tij që ta shfrytëzojnë këtë mundësi.

“Jemi në Kupën e Botës dhe raste të tilla nuk vijnë shpesh për lojtarët apo trajnerët. Duhet ta shfrytëzojmë këtë mundësi për të shkëlqyer dhe për t’u treguar të gjithëve se çfarë jemi në gjendje të bëjmë”, përfundoi Hassan.

Egjipti, shtatë herë kampion i Kupës së Afrikës, nuk ka arritur kurrë më parë të kalojë në çerekfinale të Kupës së Botës. Megjithatë, Hassan beson se kjo gjeneratë ka mundësinë ta ndryshojë historinë.

KosovaPress