​Deputetja Musliu reagon pas dënimit të personit që e kërcënoi
Lajme
Lexohet për: 2 min.
10 muaj më parë
Linku u kopjua

Deputetja e Partisë Demokratike të Kosovës, Ganimete Musliu ka reaguar pas dënimit me gjashtë muaj burgim që Gjykata Themelore në Prishtinë i caktoi personit që e kishte kanosur në dhjetor të vitit 2022. Ajo konsideron se ky dënim është shumë i ulët.

Sipas saj, personi që e kishte kanosur pranimin e fajësisë e kishte bërë krejt formalisht, porse siç tha ajo ishte treguar vetëm për një moment i sinqertë, kur gjatë seancës kishte deklaruar se “kishte rënë nën ndikimin e propagandës së Lëvizjes Vetëvendosje.

“Sot Gjykata e dënoi me gjashtë muaj burg personin që më kanosi në dhjetor të vitit të kaluar, pas një debati të ashpër që kisha me kryeministrin Kurti në seancë plenare. Ky person që më kanosi nga Zvicra, të premten në seancë tha se “nuk voton në Kosovë prej 20 vitesh” dhe pranimin e fajësisë e bëri krejt formalisht e në mënyrë të pasinqertë. Por, në një pikë ai ishte shumë i sinqertë. Deklaroi se “kishte rënë nën ndikimin e propagandës së Lëvizjes  Vetëvendosje”. Ky është një shembull konkret se gjuha me të cilën partia – shtet i ushqen militantët e saj, është gjuhë e urrejtjes, përçarjes dhe mos durimit. Dhe si e tillë jo vetëm e papranueshme por edhe e dënueshme”, ka shkruar ajo në Facebook.

Musliu ka paralajmëruar se do të ndërmarrë veprimet e nevojshme për të kundërshtuar dënimin prej gjashtë muaj burgim, meqë sipas saj është “shumë i ulët”.

“Përndryshe, konsideroj se dënimi ndaj personit që më kanosi, është shumë i ulët dhe do të konsultohem me avokatin tim për të ndërmarrë veprimet e nevojshme për ta kundërshtuar me ankesë”, përfundoi ajo.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2024