Këshilli Shtetëror Zgjedhor ka numëruar 93.96 për qind të votave të deritanishme sipas të cilave parti e parë në zgjedhjet parlamentare në Maqedoninë e Veriut del VMRO DPMNE, deri tash opozitare, me 43.09 për qind ose 406 mijë e 239 vota që i sigurojnë aktualisht 59 mandate. Në vendin e dytë renditet Koalicioni për të ardhmen evropiane LSDM me 143 mijë e 267 vota ose 15.20 për qind që aktualisht i siguron 18 mandate. Fronti Evropian me BDI-në e Ali Ahmetit ka fituar 14.01 për qind ose 132 mijë e 89 vota - 19 mandate, ndërsa koalicioni tjetër shqiptar VLEN 10.91% ose 102 mijë e 863 vota - 13 mandate. Pjesëmarrje në përbërjen e re të Kuvendit të Maqedonisë e kanë siguruar edhe partia politike E Majta me 6.78 për qind ose 63.944 vota që aktualisht i sigurojnë 6 mandate dhe Lëvizja Unë di - Për Maqedoninë Tonë ka fituar 5.32 për qind ose 50.187 vota që aktualisht i sigurojnë 5 mandate.