Vikendi sjell spektakël në gjysmëfinale të “Play-offit” të Superligës së Kosovës në basketboll
Këtë vikend do të fillojnë ndeshjet gjysmëfinale të “Play-offit” të Superligës së Kosovës, ku pritet spektakël në basketbollin vendor.
Në gjysmëfinale do të përballen katër skuadrat që u renditën më lartë, ku katër skuadra do të luftojnë për trofeun e çmuar, raporton KosovaPress.
Peja dhe Golden Eagle Ylli kishin pikë të barabarta pas 28 xhirosh, por pejanët ishin më të mirë në ndeshjet direkte. Dy skuadrat verdhezi kishin nga 19 fitore e nëntë humbje, ndërsa të shtunën do të përballen të dyja me fillim nga ora 17:15.
Gjysmëfinalja tjetër pritet të jetë edhe më e zjarrtë mes Trepçës dhe Sigal Prishtinës. Mitrovicasit e përfunduan edicionin në vendin e parë me 25 fitore e tri humbje, ndërsa bardhekaltrit u renditën në vendin e katërt me 16 fitore e 12 humbje, kurse në çerekfinale eliminuan Vëllaznimin 2:1.
“Xehetarët” kanë fituar Kupën, Superkupën dhe Ligën Unike, duke e kërkuar trofeun e katërt për këtë edicion, kurse prishtinasit së fundi fituan në Ligën Ballkanike, duke kërkuar titullin të rikthehet në kryeqytet.
Gjysmëfinalet 1
E shtunë
17:15 Peja - Golden Eagle Ylli
E diel
19:00 Trepça - Sigal Prishtina
