Gjendja e Urës së Gjakut në Mitrovicë, që lidh lagjen “Vaganicë” me Stacionin e Autobusëve, ka nevojë për intervenime, ndërsa Ministria e Infrastrukturës ka bërë të ditur se së shpejti do të vendoset nëse do të rehabilitohet apo do të ndërtohet urë e re.

Në një përgjigje me shkrim për KosovaPress, ministria ka theksuar se gjendja e sigurisë së urës aktualisht vlerësohet stabile, ndonëse janë evidentuar disa dëmtime.

“Po jemi në dijeni dhe gjendja e sigurisë së kësaj ure është stabile por e përcjell me disa dëmtime (pa rrezik për pjesëmarrës në komunikacion). Ura inspektohet në baza të rregullta, po ashtu kemi bërë inspektim pas pyetjeve të juaja, dhe të gjeturat janë se ura ka disa dëmtime dhe paraqitet nevoja për intervenime”, thuhet në përgjigjen e Ministrisë së Infrastrukturës.

Tutje, ministria ka bërë të ditur se stafi teknik i Departamentit të Infrastrukturës Rrugore, së bashku me kompaninë projektuese dhe menaxherin e Rajonit të Mitrovicës, kanë vizituar urën, ndërsa në ditët në vijim pritet të përgatitet një raport fillestar i detajuar për gjendjen e saj.

Sipas ministrisë, pas këtij vlerësimi do të jepen rekomandime nëse ura ekzistuese duhet të rehabilitohet apo nëse do të ndërtohet një urë e re.

“Ditët në vijim kompania projektuese do të përgatisë një raport fillestar të detajuar rreth gjendjes së Urës në lagjen Vaganicë dhe do të dalë me rekomandim nëse duhet të rehabilitohet ura ekzistuese apo të ndërtohet urë e re”, thuhet më tej.

Në përfundim, ministria ka njoftuar se deri në hartimin e projektit për rehabilitimin e urës ekzistuese apo ndërtimin e një ure të re, do të ndërhyjë në kuadër të kontratës së mirëmbajtjes së rrugëve nacionale dhe rajonale për Rajonin e Mitrovicës.

Ndërkohë, qytetarët që e shfrytëzojnë këtë urë çdo ditë kanë shprehur shqetësime për gjendjen e saj, duke thënë se objekti është lënë pas dore prej vitesh dhe paraqet rrezik, veçanërisht për fëmijët.

Edhe Avdyl Mehmeti është shprehur se gjendja aktuale është e rrezikshme për kalimtarët, ndërsa një banor tjetër, që nuk ka dashur të identifikohet, ka thënë se ura ka nevojë për renovim të plotë.

KosovaPress ka kontaktuar edhe Komunën e Mitrovicës lidhur me këtë çështje. Drejtori i Infrastrukturës, Naser Muja, ka deklaruar se kjo urë nuk është nën kompetencë të komunës.

“Ju njoftojmë se Komuna e Mitrovicës nuk është kompetente për trajtimin e urave në këtë segment, pasi përgjegjësia bie nën Ministrinë e Infrastrukturës. Megjithatë, këtë çështje e kemi adresuar edhe më herët tek institucionet përkatëse dhe do ta riadresojmë sërish, me qëllim që të ndërmerren veprime sa më të shpejta”, thuhet në përgjigjen me shkrim.

Banorët kërkojnë ndërhyrje urgjente për sanimin e urës, për të shmangur rrezikun që, sipas tyre, po rritet çdo ditë. 

/Kosovapress/