Publicisti Ndue Ukaj, sot ka deklaruar se Ministria e Arsimit, Shkencës, Teknologjisë dhe Inovacionit nuk ka ndjeshmëri për nxënësit, pasi sipas tij, ata janë të detyruar të shkojnë në shkollë, kur pushojnë të gjithë fëmijët e Evropës.

“Ministria e Arsimit përmes një vendim të poshtër, absurd, ka bërë që fëmijët tanë - ndoshta të vetmit në Europë, me gjasë duke kopjuar një model boshnjak - të mbajnë mësim edhe pas festave të Krishtlindjes, në këto ditë kur krejt Europa pushon, sepse është kohë pushimesh. Dhe kështu ishte në Kosovë deri para pak vjetësh. E tash arsimi në Kosovë bëhet sikur punon. E them bëhet, sepse në të vërtetë, ky është një vetëmashtrim i madh. Mashtrojnë të gjithë.”, ka shkruar Ukaj.

Ai ka potencuar se kur bëhet fjalë për arsimin, Kosova është në pozitën më të keqe në Evropë.

“Jam fort i bindur se Ministria e Arsimit këtë vendim nuk e ka marrë duke u bazuar te ndonjë analizë, as e nxitur nga nevojë për të mësuar më shumë apo për të përmirësuar cilësinë në shkolla. Është vendim i poshtër, hakmarrës dhe antikulturor. Ne, në të gjitha pikëpamjet, kur bëher fjalë për arsimin, jemi më së keqi në Europë. Ky vendim, si i tillë lidhet me dofarë ide të marra e dokrra që tufa e shkretanëve të politikës nuk di as t’i gjykojë e as t' i arsyetojë.”, ka shkruar ai në Facebook.

Publicisti Ukaj ka shtuar se mësimi ndërmjet festave s’është mësim, por sipas tij, mashtrim.

“Shkollat në Europë e përfumdojnë mësimin para ose me 24 dhjetor; kështu ishte deri vonë edhe te ne. Prandaj, e përsëris- është poshtërsi dhe vendim tepër i lig që fëmijët tanë të ndahen prej fëmijëve europianë, prej bashkëmoshatarëve të tyre dhe prej mijëra fëmijëve shqiptarë që jetojnë nëpër Europë, për shkak të tutkunave tanë. Mësimi ndërmjet festsve s' është mësim, është iluzion se po mësohet. Është mashtrim. Këtë e thonë shumica e fëmijeve dhe këtë fakt e pohojnë prindërit e mësimdhënësit. Kam lexuar diku një akademik francez që ka thënë se "Ministria e Arsimit është ministri që mbart fatin tonë. Me çfarë duhet të merret me përparësi kombi përveçse me formimin arsimor?" Nëse Ministria e Arsimit bart fatin tonë, siç thonë të mençurit, imagjinojeni në çfarë mjerimi jemi ne si vend. Për ne, kjo tingëllon e trishtë, meqë Ministria e Arsimit duket qartë se bartë arrogancë të pashembullt dhe shquhet për mungesë totale vizioni.”, ka shkruar publicisti, duke shtuar se “këto janë barrikadat e vërteta të Kosovës”.

Kujtojmë që, MASHTI muaj më parë kishte njoftuar se gjysmëvjetori i parë për të gjitha nivelet e arsimit para-universitar do të përfundojë më datë 27.01.2023, ndërsa pushimi dimëror për të gjitha nivelet e arsimit para-universitar do të fillojë 30.01.2023 dhe do të mbarojë më 03.02.2023. Gjysmëvjetori i dytë do të fillojë më 06.02.2023.