Udhëheqësi i ri suprem i Iranit, Mojtaba Khamenei, është “i sigurt dhe në gjendje të mirë”, pavarësisht plagëve të marra gjatë luftës, ka thënë të mërkurën Yousef Pezeshkian, këshilltar qeveritar dhe djali i presidentit të Iranit.

Në një postim në kanalin e tij në Telegram, Pezeshkian tha se kishte dëgjuar lajme se Mojtaba Khamenei ishte plagosur, por kishte kërkuar informacione nga persona me lidhje të besueshme.

“Kam dëgjuar lajme se zoti Mojtaba Khamenei ishte plagosur. Pyeta disa miq që kanë lidhje dhe më thanë se, falë Zotit, ai është i sigurt dhe në gjendje të mirë”, ka shkruar ai.

Televizioni shtetëror iranian e kishte përshkruar më herët Khamenein, 56 vjeç, si “veteran të plagosur të luftës së Ramazanit” por nuk kishte dhënë detaje për natyrën e plagëve të tij.

Sipas The Guardian, këto deklarata vijnë mes spekulimeve për shëndetin dhe vendndodhjen e Khameneit, i cili nuk është shfaqur në publik që kur pasoi babanë e tij të ndjerë, Ajatollah Ali Khamenei, në postin e udhëheqësit suprem tre ditë më parë.

Sipas gazetës New York Times, Khamenei është plagosur në ditën e parë të sulmeve të Shteteve të Bashkuara të Amerikës dhe Izraelit ndaj Iranit, duke cituar tre zyrtarë iranianë dhe dy izraelitë që folën në kushte anonimiteti.