Presidenti i SHBA-së, Donald Trump, ka thënë se do të vendosë tarifa globale prej 15%, ndërsa vazhdoi të kundërshtonte një vendim të Gjykatës së Lartë që rrëzoi taksat e tij të mëparshme të importit.

Trump tha të premten se do t'i zëvendësonte tarifat e hequra nga gjykata me një taksë prej 10% për të gjitha mallrat që hyjnë në SHBA.

Por të shtunën, ai njoftoi në Truth Social se kjo do të rritej në 15%, shkruan BBC, transmeton KosovaPress.

Këto do të hyjnë në fuqi të martën, më 24 shkurt, dhe mund të qëndrojnë në fuqi vetëm për rreth pesë muaj para se administrata të duhet të kërkojë miratimin e Kongresit.

Shtëpia e Bardhë sqaroi se tarifat e reja, që fillojnë nga 24 shkurt, zëvendësojnë pjesërisht tarifat 10–50 për qind të vendosura më parë, të cilat Gjykata e Lartë i shpalli të paligjshme.

Përjashtime mbeten për automobilat, disa kamionë të lehtë, produkte ajrore, farmaceutike, minerale kritike dhe produkte bujqësore nga Meksika dhe Kanada.

Sekretari amerikan i Financave, Scott Bessent, tha se të ardhurat nga tarifat do të mbeten praktikisht të njëjta gjatë vitit 2026.

Trump paralajmëroi gjithashtu hetime të reja për praktika tregtare jo të ndershme kundër Kinës, Brazilit, dhe mundësisht edhe ndaj Vietnamit dhe Kanadasë.

Lideri amerikan deklaroi se SHBA-ja po përdor këtë masë për të adresuar “një deficit të madh dhe serioz të bilancit të pagesave” dhe se alternativa të tjera do të ndihmojnë në rritjen e të ardhurave dhe forcimin e ekonomisë amerikane.