Trajneri kujton Leonit Aliun që u mbyt në Shëngjin: Ishte djal shembullor e fort gazmor
Leonit Aliu nga Rezalla e Skenderajt është njëri nga dy të rinjtë kosovarë që e humbën jetën në Shëngjini, të mërkurën. Ai kishte pasion futbollin, dhe fillimisht ishte i angazhuar në klubin FC "Drenica" e më pas në KF "Fushë Kosova".
Ish-trajneri i Aliut në FC "Drenica" e njëkohësisht edhe kushëriri i tij, Lulzim Dërguti e kishte të vështirë të fliste dhe ta kujtonte atë, një ditë pas vdekjes fatale. Mes emocioneve, ai e vlerësoi Leonitin si djalë shumë të mirë dhe të shoqërueshëm që e donte shumë futbollin.
"E kam shumë të vështirë, fjalët po më dalin me pak me vështirësi, po po mundohem me u përmbajtë. Leoniti ka qenë një djalë i mirë, një djalë i shoqërueshëm, një djalë shumë shumë shumë shumë shumë i mirë. Ka pasë ka pasë talent në futboll, e ka dashtë futbollin shumë", tha Dërguti.
Leoniti ishte vëlla i vetëm i dy motrave, e që sipas kushëririt të tij, ishte mjaft gazmor dhe që sjellte harmoninë më të madhe në ekip.
"Ka qenë shumë gazmor. Ka qenë... ka kaluar shumë mirë me ta. Edhe edhe ka qenë një prej djemve... harmoninë më të madhe e ka prurë në ekip për shembull. Ka pasë me atë shoqërinë e vetë ka pasë shumë. Edhe unë si trajner kam kaluar shumë mirë. Në fillim ka pasë vështirësi, si çdo lojtar i ri si të vjen, po me kalimin e kohës...", tha ai.
Në ekip kishte rolin e sulmuesit të krahut dhe atij anësor, kishte disiplinë dhe kishte një baba shumë të përkushtuar ndaj tij, tha trajneri Lulzim Dërguti.
"I disiplinuar, i disiplinuar, shumë e ka dashtë futbollin. Po, këto katër vite, mbas katër viteve, katër-pesë viteve ka kaluar... ka shkuar me familje në Fushë Kosovë. Prindërit e tij kanë ndenjtë shumë afër, shumë e ka prurë me veturë prej prej Rezallës ose në Skenderaj kanë kaluar... ku ndodhet... kanë banuar në Skenderaj, gjithsesi kanë ndenjtë shumë gati. Bekimi, një... babi... prindi i tij është një prind shumë i përkushtuar ka qenë për Leonitin, po djalë hasreti, domethënë djali i vetëm në familje aty, po edhe me secilin... po po po shumë shumë vështirë e kam edhe me me folë, me biseduar. Sepse dje e kam e kam marrë... dje e kam parë si ka ndodhur rasti në Shëngjin, po sot me mëngjes e pashë si kishte qenë ai me një shok të vet, tjetri i Drenasit, komuna e Drenasit. Çfarë me bë, jeta është e tillë", u shpreh Dërguti.
Ai bëri të ditur se në varrimin e tij do të organizohen si ekip për të shkuar dhe shprehur ngushëllime, pasi që edhe shokët e kanë përjetuar rëndë vdekjen e tij.
Bashkë me Leonitin vdiq edhe Jetmir Binaku, derisa tre shokë të tyre u shpëtuan në gjendje të rëndë.
/Kosovapress/
