Një gjuajtje me armë zjarri ka ndodhur të martën në rrugën ‘Gazmend Zajmi” në lagjen “Aktash” të Prishtinës. Lajmin për KosovaPress e ka konfirmuar zëdhënësja e Policisë për Rajonin e Prishtinës, Flora Ahmeti, e cila tha se s’ka të lënduar, sipas informatave fillestare.
“Sot rreth orës 14:20, kemi marrë informatën për gjuajtje me armë zjarri të ndodhur në rrugën 'Gazmend Zajmi" në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen”, tha ajo për KosovaPress.
Sipas Ahmetit, bazuar në të dhënat fillestare, në këtë rast nuk ka persona të lënduar.
Dy ditë më parë një përplasje e armatosur mes dy grupeve ka ndodhur në kryeqytet, përkatisht në rrugën “Gazmend Zajmi”, ku mbeti i vrarë një person. Si pasojë, e gjuajtjeve me armë mbeten edhe pesë të plagosur të cilët po trajtohen në QKUK.
