Të paktën 59 palestinezë vdiqën në burgjet izraelite që nga fillimi i luftës në Gaza
Rajoni
Lexohet për: 2 min.
aa
1 muaj më parë
Linku u kopjua

Të paktën 59 të burgosur palestinezë kanë vdekur në burgjet izraelite që nga fillimi i luftës së Gazës në tetor 2023.

Shoqata e të Burgosurve Palestinezë njoftoi se në mesin e viktimave janë 38 të burgosur nga Rripi i Gazës, raporton AA.

Kjo shoqatë akuzoi autoritetet izraelite për fshehjen e vdekjes së shumë të burgosurve të Gazës në paraburgim.

Shoqatat palestineze dje njoftuan se një i burgosur nga Gaza, Musab Hani Haniyeh, vdiq në paraburgimin izraelit.

Haniyeh, 35-vjeç, nga qyteti jugor Khan Younis, u arrestua nga ushtria izraelite më 3 mars 2024. Sipas familjes së tij, Haniyeh ishte në gjendje të mirë shëndetësore para ndalimit.

Sipas shifrave palestineze, që nga pushtimi i Bregut Perëndimor dhe Gazës nga Tel Avivi në vitin 1967, të paktën 296 të burgosur palestinezë kanë vdekur në paraburgimin izraelit.

Të paktën 10 mijë palestinezë mbeten në burgjet izraelite. Shifra nuk përfshin të arrestuarit nga Rripi i Gazës, numri i të cilëve vlerësohet të jetë në mijëra.

Që nga 19 janari, në Gaza është në fuqi marrëveshja e armëpushimit, duke ndalur luftën gjenocidale të Izraelit, që ka vrarë më shumë se 48.350 palestinezë, shumica prej tyre gra dhe fëmijë, duke e lënë enklavën në gërmadha.

Gjykata Ndërkombëtare Penale (GJNP) lëshoi ​​urdhërarreste në nëntor për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një padi për gjenocid në Gjykatën Ndërkombëtare të Drejtësisë (GJND) për fushatën e tij ushtarake.

Kjo webfaqe mirëmbahet dhe menaxhohet nga Agjencia e Lajmeve KosovaPress. KosovaPress mban të drejtat e rezervuara me copyright sipas dispozitave ligjore për të drejtat e autorit dhe pronës intelektuale. Përdorimi, modifikimi dhe shpërndarja për qëllime komerciale pa marrëveshje me KosovaPress, ndalohet rreptësisht.
Ky aplikacion uebsajti është zhvilluar me mbështetjen e #SustainMedia Programme, i bashkëfinancuar nga Bashkimi Evropian dhe Qeveria Gjermane, ndësa implementohet nga GIZ, DW Akademie dhe Internews. Përmbajtja e tij është përgjegjësi vetëm e KosovaPress dhe nuk pasqyron domosdoshmërisht pikëpamjet e BE-së apo të Qeverisë Gjermane.
Të gjitha të drejtat e rezervuara nga A.P.L. KosovaPress © 2002-2025