Shefi i grupit parlamentar të Aleancës për Ardhmërinë e Kosovës, Besnik Tahiri deklaroi se qasja aktuale e shumicës parlamentare është më e dobëta në historinë e parlamentarizimit. Sipas tij, secili ligj i cili ka ardhur në kuvend ka qenë anti-kushtetues. Kështu u shpreh ai pas tryezës së diskutimit me përfaqësues nga ekonomia dhe me bizneset e sektorit privat. Tahiri shtoi se komunikimi i rregullt i qeverisë me sektorin privat nuk ekziston.

Pas tryezës së katërt së organizuar të AAK-së, shefi i deputetëve të kësaj partie, tha se këto takime i kanë mjet pune, ku të gjitha konkluzionet do të bëhen bashkë për të ndërtuar një platformë.

Në konferencë për media, Tahiri tha se ka investime kapitale të dobëta nga ana e shtetit.

Deputeti i Aleancës për Ardhmërinë e Kosovës përmendi edhe mungesën e kushteve për investime të huaja, përkundër siç tha ai, interesimit të diasporës.

Në këtë takim, Tahiri shtoi se u përmend edhe çështja e stopimit të hekurudhës Kosovë-Shqipëri, e cila sipas tij, do të ndihmonte dhe mundësonte lidhjen me Portin e Durrësit. 

Veç tjerash, deputeti Besnik Tahiri tha se do të vazhdojnë me ciklin e komunikimit me sektorin privat çdo muaj.