Ministri i Punëve të Brendshme Xhelal Sveçla ka dhënë detaje rreth aksionit të bastisjes sot në kryeqytet, duke thënë se ajo është kryer në bazë të informacioneve mbi aktivitetin e dyshimtë të një organizate joqeveritare, e vendosur në një aneks të Stacionit Policor Qendra në Prishtinë.

Departamenti i Organizatave Joqeveritare në kuadër të MPB-së ka konfirmuar se organizata “Centar za Mir i Toleranciju Pristina” (Qendra për paqe dhe tolerancë Prishtinë) nuk ka respektuar legjislacionin në fuqi mbi funksionimin e OJQ-ve. Pas bastisjeve është kuptuar që ajo hapësirë nuk është shfrytëzuar për natyrën e kësaj OJQ-je, ka sqaruar Sveçla.

MPB ka njoftuar institucionet përkatëse të sigurisë dhe është konfirmuar se e njëjta OJQ ka veprimtari ilegale, gjë e cila është vërtetuar pas hyrjes së Policisë dhe Prokurorisë brenda objektit.

“Një veprimtari e tillë në mes të tre institucioneve më të larta të sigurisë së Kosovës, Ministrisë së Punëve të Brendshme, Kryeprokurorisë dhe Policisë së Kosovës është tejet e dyshimtë dhe paraqet rrezik për sigurinë e vendit. Kosova është shtet unitar me të drejta e shërbime për gjithë qytetarët pa dallim. Ka kaluar koha kur në vendin tonë tolerohej paligjshmëria”, ka përfunduar Sveçla.