Prokuroria Themelore në Pejë ka dhënë detaje shtesë në lidhje me sulmin ndaj kryetarit të kësaj komune Gazmend Muhaxheri.

Shkodran Nikçi, zëdhënës i Prokurorisë Themelore në Pejë, ka bërë të ditur për KosovaPress se me këtë rast janë arrestuar dy persona, të cilët pas intervistimit janë dërguar në mbajtje për 48 orë.

“Prokurori kujdestar i Departamentit të përgjithshëm të Prokurorisë në Pejë është njoftuar se dy persona e kanë sulmuar kryetarin e komunës dhe një shoqërues të tij. Menjëherë Policia e Kosovës i ka arrestuar dy persona të pandehur. Pas intervistimit, me urdhër të prokurorit të shtetit janë dërguar në ndalim 48 orësh. Aktualisht prokurorja e çështjes është duke përpiluar kërkesën për caktimin e masës së paraburgimit për dy persona, të cilët kanë kryer vepra penale sulm ndaj personi zyrtar dhe lëndim i lehtë trupor”, ka thënë Nikçi.

Gjithashtu në koordinim të plotë me Policinë e Kosovës janë duke u ndërmarrë të gjitha veprimet e nevojshme që të sqarohen të gjitha rrethanat e këtij rasti.

Kryetari i Komunës së Pejës, Gazmend Muhaxheri, është sulmuar fizikisht sot në mëngjes në rrugën “Bill Clinton” në Pejë.

Muhaxheri ka njoftuar se pas sulmit të befasishëm është shëndosh e mirë, duke falënderuar të gjithë ata që janë interesuar për shëndetin e tij.

Përndryshe, kryetari i Aleancës për Ardhmërinë e Kosovës (AAK), Dega në Pejë, Ali Berisha, ka dënuar ashpër sulmin ndaj Gazmend Muhaxherit.

"Secili akt dhune është i papranueshëm dhe duhet të marrë epilogun meritor. Akte të tilla shëmtojnë pasqyrën tonë, qoftë si qytet, shtet e komb", ka thënë Berisha.