Një drejtues automjeti në Gjakovë nuk e ka ndalur mjetin e tij në pikën kufitare ku po bëheshin kontrollet rutinë policore, edhe pse zyrtarët policorë kanë tentuar ta ndalojnë në magjistralen Prizren – Gjakovë, kjo nuk u arrit.

Ai nuk u ndalua derisa bëri aksident duke goditur një automjet civil në rrugën “Gasper Karaqi”, në Gjakovë.

Lajmin për KosovaPress e ka konfirmuar zëdhënësja e Policisë për Gjakovë, Vlera Krasniqi.

“Zyrtarët policorë janë vënë në ndjekje të tij dhe, me mbështetjen e njësive të tjera, kanë tentuar ta ndalojnë në rrugën magjistrale Prizren–Gjakovë, mirëpo ai ka refuzuar sërish të ndalojë dhe ka tentuar t’i godasë zyrtarët policorë.  Gjatë përcjelljes nga një patrullë tjetër policore në rrugën “Gasper Karaqi” në Gjakovë, i dyshuari ka goditur automjetin zyrtar të Policisë, duke shkaktuar aksident trafiku ku është përfshirë edhe një automjet civil”, tha Krasniqi.

Bëhet e ditur se pas aksidentit, i dyshuari është përpjekur për t’u larguar në këmbë, por është ndaluar dhe shoqëruar në stacionin policor.

Në koordinim me prokurorin e shtetit, ndaj tij janë iniciuar rastet “Shkaktim i rrezikut të përgjithshëm” dhe “Sulm ndaj personit zyrtar”, ndërsa është ndaluar për 48 orë.

/Kosovapress/