Kryeministri i Malit të Zi Milojko Spajiq ka komentuar faktin se deputetja Maja Vukiçeviq e Partisë Popullore Demokratike votoi kundër anëtarësimit të Kosovës në Këshillin e Evropës (KiE) dhe njoftoi se qëndrimi zyrtar i Podgoricës do të dihet në prill. Më 27 mars, Maja Vukiqeviq, kryetare e delegacionit malazez në Komitetin për Politikë dhe Demokraci në Asamblenë Parlamentare të Këshillit të Evropës (PACE), votoi kundër propozimit që Kosova të bëhet anëtare e Këshillit të Evropës.

“Mendoj se ka qenë një votim i fshehtë dhe se nuk ka qenë as votim, por diskutim për atë temë. Votimi i vërtetë do të bëhet në prill, kur do të kemi një seancë plenare dhe kur do të kemi një këshill ministror, ​​kur do të mund të shihni qëndrimin zyrtar të shtetit të Malit të Zi,” tha Spajiq duke iu përgjigjur mediave të Malit të Zi. Zëvendëskryeministri i Kosovës Besnik Bislimi dhe ministrja për Çështje Evropiane të Malit të Zi, Maida Gorçeviq, deklaruan së fundi në Prishtinë se Mali i Zi nuk ka votuar kundër anëtarësimit të Kosovës në Këshill të Evropës.

Gjatë një konference për medie, Bislimi tha se vota ishte e një përfaqësueseje të një partie politike dhe jo qëndrim i shtetit të Malit të Zi. Të njëjtën gjë e tha edhe vetë ministrja për Çështje Evropiane të Malit të Zi, Maida Gorçeviq. Maja Vukiçeviq është anëtare e Partisë Popullore Demokratike (DNP) pro-ruse në parlamentin malazez, njëherësh deputete e ish-Frontit Demokratik, agjenda e të cilit përfshinte tërheqjen e njohjes së Kosovës, heqjen e sanksioneve kundër Rusisë dhe daljen e Malit të Zi nga NATO. Asambleja Parlamentare e Këshillit të Evropës ka konfirmuar se diskutimi për anëtarësimin e Kosovës do të mbahet më 18 prill, nga ora 10:00-12:30, dhe aty  do të prezantohet raporti nga raportuesja për Kosovën Dora Baokyannis, Azdeh Rojhan nga Suedia dhe Beatrice Fresko-Rolfo nga Monako.

Pas debatit, pritet të ketë votim dhe nëse Kosova kalon me sukses këtë fazë, votimi që pritet të ndodhë në maj në Këshillin e Ministrave të Këshillit të Evropës do të jetë përcaktues nëse vendi do të anëtarësohet në KiE. Ndryshe, Komiteti për Çështje Politike dhe Demokraci i Këshillit të Evropës ka rekomanduar anëtarësimin e Kosovës në Këshillin e Evropës pa asnjë parakusht shtesë. Opinioni i Bakoyannis kërkon largimin e fusnotës nga denominimi i Kosovës, e cila është përdorur që nga viti 2008 në çdo raport dhe komunikim mbi dhe me Kosovën. Gjithashtu, rekomandohet që Kosova të ftohet si shtet, sipas nenit 4 të Statutit të KiE, dhe jo si vend, sipas nenit 5. Anëtarësimi i Kosovës në Këshillin e Evropës do të ketë ndikim të jashtëzakonshëm në promovimin dhe mbrojtjen e të drejtave të të gjitha komuniteteve të vendit.