Një nga befasitë më të mëdha të këtij viti ka ndodhur në Grand Slam-in e Roland-Garros.

Numri 1 i botës dhe favoriti kryesor për titull, Jannik Sinner, është eliminuar në raundin e dytë nga argjentinasi Juan Manuel Cerundolo (nr. 56 në botë), pas një përmbysjeje dramatike në pesë sete: 3-6, 2-6, 7-5, 6-1, 6-1.

Sinner ishte plotësisht në kontroll të ndeshjes, duke udhëhequr me dy sete dhe duke pasur avantazhin 5-1 në setin e tretë, ku po shërbente për të fituar të gjithë takimin. Megjithatë, temperaturat e larta që arritën deri në 32°C në Paris ndikuan rëndë te italiani, i cili filloi të vuante nga ngërçet e forta muskulore dhe marramendja. Ai humbi 15 pikë radhazi përpara se të kërkonte ndihmë mjekësore, çka i dha mundësi Cerundolos të përmbyste gjithçka, duke fituar 18 nga 20 gjejmët (games) e fundit të ndeshjes.

Kjo humbje ndërpret gjithashtu një seri mbresëlënëse prej 30 fitoresh radhazi që Sinner gëzonte që nga muaji shkurt.

Deklaratat pas ndeshjes

Pas këtij triumfi të papritur, Juan Manuel Cerundolo u shpreh i keqardhur për gjendjen fizike të rivalit të tij:

"Ishte e vështirë për të. Ai po e fitonte ndeshjen dhe unë nuk arrita të merrja më shumë se tre gjejmë në asnjë nga dy setet e para. Mendoj se isha paksa me fat dhe më vjen vërtet keq për të... ai po shërbente për të fituar, por pastaj nuk e di çfarë ndodhi. Besoj se kishte ngërçe, ose ndoshta ishte presioni i ndeshjes. Sidoqoftë, shpresoj të rikuperohet shpejt.