Një trajtim i ri i kancerit mund të ndalojë përparimin e sëmundjes te pacientët që janë rezistent ndaj imunoterapisë, kanë njoftuar mjekët.

Imunoterapia përdor sistemin imunitar për të vrarë qelizat e kancerit dhe mund të shpëtojë jetë kur opsionet e tjera të trajtimit, si kirurgjia, radioterapia ose kimioterapia, kanë dështuar. Megjithatë, nuk mund t’i ndihmojë të gjithë pacientët dhe disa tumore mund të evoluojnë për t’i rezistuar.

Tani, onkologët në Mbretërinë e Bashkuar kanë gjetur një trajtim – imunoterapia e kombinuar me guadecitabinë, një ilaç i ri eksperimental – i cili  mund të ndryshojë rezistencën e kancerit ndaj imunoterapisë. Pacientët që pritej të vdisnin pasi kishin dështuar të gjitha opsionet e trajtimit mbijetuan shumë më gjatë, zbuluan ata.

Kombinimi i pembrolizumabit, një ilaç imunoterapie, dhe guadecitabinës, ndaloi përparimin e kancerit në më shumë se një të tretën e pacientëve të regjistruar në provën e hershme të fazës së parë. Rezultatet janë publikuar në Journal for ImmunoTherapy of Cancer.

Kombinimi i dyfishtë mund të bëhet një armë e re efektive kundër disa formave të kancerit, thanë ekspertët në Institutin e Kërkimit të Kancerit dhe Fondacionin Royal Marsden.

Pacientët në provë, nga spitali Royal Marsden dhe University College London, përfshinin ata me kancer të mushkërive, gjirit, prostatës dhe zorrëve.

Udhëheqësja e studimit, Dr. Anna Minchom, një shkencëtare dhe onkologe, tha: “Imunoterapia ka treguar rezultate të mahnitshme në kujdesin ndaj kancerit gjatë dekadës së fundit, por nuk funksionon mirë në të gjitha kanceret dhe kanceret shpesh mund të bëhen rezistente. Ky kombinim mund të jetë një mënyrë për të luftuar kancerin edhe pasi ai të ketë pushuar së reaguari ndaj imunoterapisë.”/Alsat Mk/