Përfaqësuesit politikë dhe institucionalë të serbëve të veriut të Kosovës, pas takimit të jashtëzakonshëm të mbajtur sot në Zvecan, kanë vendosur të braktisin të gjitha institucionet e Kosovës, përfshirë këtu Kuvendin, Qeverinë, gjyqësorin, policinë dhe komunat.

Sipas tyre, ky vendim vlen derisa Prishtina zyrtare të tërheqë vendimet, siç i quajtën ata të njëanshme, për targat dhe të tjerat, si dhe të respektojë marrëveshjet e Brukselit.

"Ne përfaqësuesit politikë nga Kosova, pas takimit të sotëm, njëzëri kemi marr vendimet e radhës... Ne serbët e Kosovës thërrasim Prishtinën që t’i kthehet respektimit të së drejtës ndërkombëtare marrëveshjes se Brukselit dhe të gjitha akteve të tjera që janë arritur në kuadër të dialogut mes Beogradit dhe Prishtinës, i cili bazohet na bazë të mandatit të Kombeve të bashkuar dhe në ndërmjetësimin e BE... Kemi vendosur që të lëshojmë të gjitha institucionet politike, pra Kuvendin, Qeverinë dhe katër komunat në veri të Kosovës, por po lëshojmë edhe përfaqësimin dhe punën në organet e drejtësisë, policisë në veri dhe i gjithë stafit administrativë në katër komunat në veri të Kosovës”, deklaroi Rakiq.

Kreu i Listës Serbe tha se vendimi mbetet në fuqi deri në tërheqjen e Prishtinës për regjistrimin e veturave me targat e Republikës së Kosovës.

Me rend, edhe deputetët e Kuvendit të Kosovës dhe kryetarët kanë dhënë dorëheqje, ndërsa pjesëtarët serbë të Policisë së Kosovës hoqën uniformat.