Roma tani është në prag të transferimit të Matias Soulés nga Juventusi pasi rriti ofertën e tyre në 28 milion euro plus bonuse, pasi edhe pse Leicester City ofroi më shumë, lojtari i dëshiron vetëm “Giallorossët”.

Talenti argjentinas bëri përshtypje gjatë periudhës së tij të huazimit te Frosinone sezonin e kaluar dhe do të shitet këtë verë për të mbledhur fonde për strategji të tjera transferimi, raporton KosovaPress.

Edhe pse Juventusi fillimisht kishte shpresuar të merrte 40 milionë euro për Soulén, dhe hodhi poshtë një propozim më të madh se ai në mes të sezonit nga Arabia Saudite, raportohet se gjiganti italian tani do të pranojë 30 milionë euro plus bonuse.

Leicester City e ka ofruar tashmë atë shumë, por lojtari i ka vendosur sytë te Roma pas bisedimeve me trajnerin Daniele De Rossi dhe ka informuar të gjitha klubet nëpërmjet agjentit të tij se ai do të pranojë vetëm “Giallorossi”.

Eksperti i transferimeve të “Sportitalia”, Alfredo Pedullà, pohon këtë pasdite se Roma po përmirëson vazhdimisht propozimin e tyre në 28 milionë euro plus bonuse dhe po i afrohet një marrëveshjeje.