Ftesën e Prokurorisë Speciale për intervistim të kryeministrit Albin Kurti, ministrja e Drejtësisë, Albulena Haxhiu po e konsideron përpjekje për ta dëmtuar Lëvizjen Vetëvendosje në prag të zgjedhjeve parlamentare të 9 shkurtit. Duke e përmendur rastin e rezervave shtetërore, ajo thotë se ftesa ka mundur të bëhet më herët.

Ministrja e Drejtësisë, Albulena Haxhiu për KosovaPress thotë se Prokuroria Speciale po zhvillon “një luftë speciale” kundër qeverisë Kurti dhe Lëvizjes Vetëvendosje.

“Rasti i rezervave shtetërore ka ndodhur gjegjësisht para më shumë se 1 viti, dhe ishte e çuditshme se si prokuroria në kohën kur kryeministri Kurti, si kryetar i Lëvizjes Vetëvendosje dhe Kryesia e LVV-së diskutonin për listën e kandidatëve për deputetë, njoftohem nga kryeministria që për të paska ardhur një ftesë në cilësinë e dëshmitarit në raport me këtë rast. Sigurisht që nuk ishte diçka e habitshme, por në fakt është një tregues i qartë i luftës speciale që kjo prokurori po e bënë kundrejt kryeministrit Kurti”, thotë Haxhiu.

Sipas Haxhiut, kjo ftesë është tendencioze.

Në gusht të vitit të kaluar, gjatë një aksioni, Prokuroria Speciale kishte arrestuar një biznesmen dhe dy zyrtarë të Ministrisë së Industrisë, Ndërmarrësisë dhe Tregtisë nën dyshimin për dallavere me rezervat shtetërore.

Kryeministri nuk u paraqit sot në prokurori, siç parashihej në ftesë, me arsyetimin se ndodhet në një udhëtim jashtë vendit – të planifikuar më herët.

Më vonë, Zyra e Kurti tha se “kryeministri Kurti ka shprehur gatishmërinë t’i mirëpres prokurorët e rastit në zyrën e tij në një ditë dhe orë të dakorduar nga të dy palët për të përmbushur kërkesën e dalë nga ftesa e prokurorisë”.

Këtë, Haxhiu e konsideron si diçka “normale  nëse Prokuroria Speciale dëshiron dëshminë e Kurtit për rastin penal për të cilën është ftuar”.

Zëdhënësja e Prokurorisë Speciale, Liridona Kozmaqi tha se paraditen e së hënës janë njoftuar se kryeministri e ka të pamundur paraqitjen në këtë institucion.

Ajo tha se do të përgatitet një tjetër ftesë për Kurtin.

Ftesa e Prokurorisë Speciale ishte bërë më 11 dhjetor.

Lajmi i plotë në sistemin me parapagim...