Hamami mesjetar i Durrësit, një monument i trashëgimisë kulturore i kategorisë së parë i cili u dëmtua rëndë nga tërmeti i vitit 2019, është restauruar me mbështetjen financiare të Bashkimit Evropian.

Ambasadori i BE-së në Tiranë Silvio Gonzato theksoi rëndësinë e projektit “EU4Culture” për të ruajtur vlerat historiko-kulturore të qytetit.

“Hamami mesjetar është një projekt që e kam pasur për zemër për shkak të vlerave simbolike. Është dëshmi e trashëgimisë së larmishme fetare, social-kulturore të Shqipërisë. Është një nga 15 lokacionet që kemi restauruar në bashkëpunim me UNOPS dhe Ministrinë e Ekonomisë, Kulturës dhe Inovacionit. Janë dhe 8 lokacione të tjera ku vijon puna. Kjo mbështetje është solidaritet me Shqipërinë pas tërmetit përmes dy programeve, BE për shkollat dhe BE për kulturën. Ky është programi më i madh në i BE-së në Ballkanin Perëndimor”, tha ai.

Ndërsa, nënkryetari i bashkisë Durrës Elio Jani vlerësoi kontributin e BE-së në rimëkëmbjen e arsimit dhe kulturës pas tërmetit shkatërrimtar pesë vjet më parë.

“Projekti EU4Culture ka ndihmuar shumë pas tërmetit shkatërrimtar në rimëkëmbjen e Durrësit. Vendndodhja në zemër të Durrësit është vlerë e shtuar si për qytetarët ashtu dhe për turistët. Faleminderit për të gjithë mbështetjen që ka dhënë BE në Durrës”, tha ai.

Restaurimi i Hamamit është një mundësi më shumë për të zhvilluar më tej turizmin kulturor. Ndërhyrjet e bëra përfshinë restaurimin e sipërfaqeve të brendshme dhe të jashtme, fasadave, si dhe instalimin e teknologjisë për interpretimin digjital, që do të mundësojë një përvojë më të pasur për vizitorët.

Me një arkitekturë unike, Hamami do të jetë i hapur për publikun, duke shtuar një vlerë të re turistike dhe kulturore në qytetin e Durrësit. /tch