Talenti shqiptar Adri Mehmeti po vazhdon të tërheqë vëmendjen jo vetëm në Major League Soccer, por edhe në arenën ndërkombëtare.

Sipas raportimeve të MLS Transfers, mesfushori i ri i New York Red Bulls ka zgjuar interesimin e klubeve të mëdha evropiane si RB Leipzig dhe Bayern Munich. Për më tepër, thuhet se ka pasur edhe një rekomandim që Real Madrid ta ndjekë nga afër lojtarin para Kupës së Botës.

Mehmeti ka pasur më parë eksperienca me klubet e rrjetit Red Bull, duke u stërvitur me Red Bull Salzburg gjatë vitit 2024 dhe me RB Leipzig në vitin 2025, çka ka ndikuar në zhvillimin e tij si lojtar.

Goli i parë i talentit shqiptar në MLS i mohoi fitoren Inter Miamit, ku aktivizohet edhe ylli argjentinas Lionel Messi.

Paraqitjet e fundit dhe progresi i shpejtë i 17-vjeçarit po e vendosin atë në mesin e talenteve më premtues për të ardhmen, ndërsa interesimi nga klubet elitare tregon se një hap i madh në karrierë mund të jetë shumë afër.

Mehmeti më parë ka luajtur me përfaqësueset e moshave të Shqipërisë, ndërsa aktualisht përfaqëson Shtetet e Bashkuara.

KosovaPress