Zëvendëskryeministri Besnik Bislimi priti sot në takim ambasadoren jorezidente të Kanadasë për Kosovë, Jessica Blitt, me të cilën ka biseduar rreth raporteve bilaterale ndërmjet dy shteteve, zhvillimet aktuale në vend dhe procesin e dialogut.

Bislimi me këtë rast falënderoi ambasadoren Blitt për mbështetjen e pareshtur të Kanadasë, duke veçuar përkrahjen ndaj proceseve të anëtarësimit të Kosovës në organizatat ndërkombëtare.

Në takim u bisedua edhe mbi bashkëpunimin për ngritjen e marrëveshjeve apo memorandumeve të mirëkuptimit për fuqizim të ndërveprimit në fusha me interes të përbashkët dhe forcimin e lidhjeve në sferat ekonomike.