Kryeministri i Shqipërisë, Edi Rama, ka thënë se de-eskalimi i situatës në veri të Kosovës mbetët prioritet dhe sipas tij pikat e vendosura nga bashkësia euro-atlantike duhen përmbushur menjëherë.

Rama ka thënë se prej dje janë të fokusuar te lirimi i policëve të Kosovës, të cilët janë rrëmbyer nga forcat serbe.

“Mesa duket KFOR-i nuk do të dalë me konkluzione publike për vendndodhjen e tre policëve të Kosovës. Pavarësisht pretendimeve të ndryshme për vendndodhjen, ata duhet të kthehen sa më parë në shtëpi. Qysh dje ne jemi 100% të fokusuar tek lirimi i tyre”, ka shkruar ai.

Ai ka thënë se de-eskalimi mbetët prioritet.

Nuk ka asnjë paralele mes tre policëve dhe personit me precedentë kriminalë të arrestuar nga policia e Kosovës në Veri. De-eskalimi mbetet prioriteti i prioriteteve dhe pikat e vendosura nga bashkësia euro-atlantike duhen përmbushur një orë e më parë”, ka shkruar Rama.

https://twitter.com/ediramaal/status/1669332226029355008

Policia e Kosovës ka deklaruar se tre zyrtarë kufitarë janë kidnapuar nga forcat serbe gjatë një patrullimi në vijën kufitare në veri të Kosovës.

Policia ka bërë të ditur se njësia policore ka qenë në detyrë thellë brenda territorit të Kosovës për të parandaluar shfrytëzimin e rrugëve ilegale.