Kryeministri i Shqipërisë, Edi Rama bëri të ditur sot se qeveria po punon për të korrektuar skemën e pagave, pas rritjes së pagës minimale.

Rama bëri të ditur se do të nisë nga nesër takimet me sipërmarrjen për domosdoshmërinë e rritjes së mëtejshme të pagave në sektorin privat, ku tanimë nga prilli minimumi i detyrueshëm është 40 mijë lekë.

“Shenjat e rritjes janë inkurajuese, por duhet të ecim më shpejt të gjithë bashkë. Ndërkohë që qeveria po bën gati korrektimin e krejt skemës së pagave pas rritjes së pagës minimale jashtë parashikimeve, si reagim ndaj vështirësive të paparashikuara të krijuara kudo prej agresionit të Putinit dhe inflacionit të luftës”, u shpreh kreu i qeverisë.

Nga 1 prilli paga minimale në Shqipëri shkon në 40 mijë lekë ose 352 euro, duke u renditur tashmë e treta në rajon, pas Malit të Zi që e ka 532 euro dhe Serbisë që e ka 460 euro pagën minimale.

Nga ana tjetër, Shqipëria lë pas Maqedoninë e Veriut që ka një pagë minimale 327 euro, Bosnjë-Hercegovinën, me një pagë minimale 304 euro dhe Kosovën që ka një pagë minimale 264 euro.

Përkundër faktit që kryeministri Rama ka shkruar për pagën në Kosovë, paga minimale në Kosovë vazhdon të jetëe 130 euro deri në moshën 35 vjeç dhe 170 euro nga mosha 35 vjeç e tutje.

Projektligji për Pagën Minimale, ka kaluar vetëm në lexim të parë në Kuvendin e Kosovës por ende nuk është miratuar në lexim të dytë.

Në muajin prill të vitit 2022, Qeveria e Kosovës kishte miratuar Projektligjin që e cakton pagën minimale në vlerë prej 264 euro bruto ose 250 euro neto, duke larguar tatimin për këtë nivel.

Kurse sindikatat e kishin kundërshtuar këtë vlerë, duke kërkuar pagë minimale mbi 400 euro.