Kryetari i Prishtinës, Përparim Rama ka prezantuar programin e Konferencës së dytë të investitorëve “Prishtina 2030”.

Në një konferencë për media, Rama potencoi se një numër i madh i investitorëve kanë shprehur interesim serioz për projektet.

Projekti i tregut të ri tek pjesa e rrethit të flamurit, që ofron shërbime për Kalabrinë, Dardaninë, Ulpianën, zonës e spitalit dhe projekti i tulltores që synon të transformohet në një qendër arti dhe teknologjisë janë dy nga investimet të cilat kryetari i Prishtinës, Përparim Rama i prezantoi të enjeten para gazetarëve.

Përveç këtyre, Rama përmendi ndërtimin e një stacioni të ri të autobusëve dhe investimin në  parkun e ri që e lidhë Dardaninë me Kalabrinë.

Derisa tregoi për projektet, i pari i kryeqytetit potencoi se investimet do të bëhen pa përdorur mjete nga buxheti i komunës.

Rama shtoi se të gjitha këto projekte janë të avancuara në aspektin arkitektonik dhe ndërlidhën me vizionin për transformimin e kryeqytetit.

Ndër të tjera, Rama përmendi edhe renovimet në Pallatin e Rinisë dhe projektin për parkun e shëndetit dhe mirëqenies.

Në konferenc për media, Rama u pyet lidhur me dështimin për miratimin e buxhetit të komunës për vitin 2025, për çka tha se opozita po bën gjithçka për ta bllokuar procesin për arsye siç u shpreh ai “puro politike”.

Kuvendi i Komunës së Prishtinës ka dështuar dje ta miratojë buxhetin për vitin 2025 në mungesë kuorumi, meqë asambleistët e Partisë Demokratike të Kosovës dhe ata të Lëvizjes Vetëvendojse kanë lëshuar sallën.