Qytetarët ankohen për çmimet e derivateve, naftëtarët nuk 'reflektojnë' pas vendimit të MINT-it
Tema
Lexohet për: 3 min.
11 muaj më parë
Linku u kopjua
Qytetarët vazhdojnë të ankohen për çmimet e larta të derivateve, ku thonë se janë të papërballueshme për standardin jetësor në Kosovë. Një gjë të tillë thonë se e kanë vërejtur edhe bashkatdhetarët, që vështirë mund të bëjnë dallimet me vendet ku jetojnë.
Megjithatë, kryetari i Shoqatës së Naftëtarëve, Fadil Berjani thotë se vendimi i Ministrisë së Industrisë, Ndërmarrësisë dhe Tregtisë për caktimin e çmimit dhe masave tjera mbrojtëse të produkteve të naftës po respektohet nga naftëtarët.
Sot (e mërkurën), KosovaPress ka vërejtur se në tregun e Kosovës se një litër naftë është treguar deri 1.43 euro për litër dhe 1.46 euro euro për një litër benzinë.
Qytetari Fehmi Preniqi nga Prishtina është ankuar sa i përket çmimeve të naftës, ku thotë se janë të papërballueshme bazuar me standardin e Kosovës.
Nuk ka kontrolle të çmimeve, siç thotë ai, për çka qeveria duhet të marrë masa të menjëhershme.
Të njëjtin mendim e ndan edhe qytetari nga Danimarka, Nazmi Krasniqi, për çka konsideron se çmimet e derivateve nuk kanë dallim me vendin ku jeton.
Abib Shabani, i cili jeton në Gjermani, i tha KosovaPress-it se çmimet në Kosovë, përfshirë edhe të derivateve janë të larta.
Kryetari i Shoqatës së Naftëtarëve, Fadil Berjani ka treguar për KosovaPress çmimet mesatare të derivateve, që janë tregtuar sot në Kosovë.
“Vendimi i Ministrisë së Industrisë, Ndërmarrësisë dhe Tregtisë është duke u respektuar, por megjithatë ne kemi bërë ankesë në këtë ministri dhe për më tutje do të vendosë Kuvendi i Shoqatës së Naftëtarëve. Çmimet mesatare në tregun e Kosovës janë: dizelli 1.36 deri 1.40 euro për litër dhe benzina 1.40 deri 1,43 euro përafërsisht”, tha ai në një përgjigje me shkrim për KosovaPress.
Së fundmi, Ministria e industrisë, Ndërmarrësisë dhe Tregtisë ka vendosur për caktimin e çmimit dhe masave tjera mbrojtëse të produkteve të naftës. Sipas këtij vendimi, marzha tregtare maksimale e lejuar e shitjes me shumicë është dy centë për litër, kurse marzha tregtare maksimale e lejuar e shitjes me pakicë është 12 centë për litër. /Sh.Pajaziti