Qendra Kosovare për Rehabilitimin e të Mbijetuarve të Torturës (QKRMT) dhe drejtorja Feride Rushiti janë nominuar për Çmimin Nobel për Paqe 2025.

Sipas njoftimit të kësaj qendre, ky nominim është rezultat i propozimit të Magnus Jacobsson, deputet i Parlamentit Suedez, i cili ka njohur dhe vlerësuar punën tonë të palodhshme për fuqizimin dhe rehabilitimin e të mbijetuarve të dhunës seksuale gjatë luftës në Kosovë.

“Kjo është një njohje e jashtëzakonshme jo vetëm për punën tonë si organizatë, por edhe për qëndresën dhe guximin e të mbijetuarve që na frymëzojnë çdo ditë. Nominimi rikonfirmon rëndësinë e misionit tonë për drejtësi, rehabilitim dhe ndërtimin e një shoqërie më të ndjeshme dhe solidarizuese. Ju falënderoj nga zemra për mbështetjen tuaj të vazhdueshme dhe për rolin tuaj të rëndësishëm në realizimin e këtij misioni. Ky sukses është një arritje e përbashkët që na motivon të punojmë edhe më shumë për të sjellë shpresë dhe ndryshim pozitiv në jetën e njerëzve që kemi privilegjin të shërbejmë. Me këtë rast, themeluesja dhe drejtorja ekzekutive e QKRMT-së, Feride Rushiti, do të ketë një prononcim për media. Prononcimi për media do të mbahet sot (17.01.2025), ora 13:00, në ambientet e Qendrës Kosovare për Rehabilitimin e të Mbijetuarve të Torturës (Rr. Hamëz Jashari, 16b/2, Prishtinë)”, thuhet në njoftim.