Granit Plava, i cili akuzohet si doras në vrasjen e Liridona Ademajt, ka deklaruar se nuk e ka kryer vrasjen e të ndjerës, por kishte marrëveshje me Naim Murselin për ta marrw përgjegjësinë për këtë vrasje. Plava, gjatë dhënies së mbrojtjes së tij para trupit gjykues, deklaroi se nuk e ka ditur se për kë bëhej fjalë, raporton KosovaPress.

Ai tha se Naim Murseli i kishte premtuar që, pa u bërë 2 vite, do ta nxirrte nga burgu, duke ia përmendur edhe autoritetin që ai ka. Madje, Murseli kishte shkuar më larg duke i thënë se për këtë rast është në dijeni edhe Behxhet Pacolli.

Për të akuzuarin, Granit Plava, fillimisht pyetje bëri avokati i tij, Skënder Gojani, i cili kërkoi të di më shumë për gjendjen familjare dhe ekonomike.

Plava deklaroi më pas se është babai i tre fëmijëve dhe gjendja e tij ekonomike në familje është e dobët.

Madje, ai shtoi se ka qenë punëtor krahu, ndërsa mohoi të jetë akuzuar për vepra penale më parë.

Ndërsa, kur u pyet se a qëndron prapa deklaratës së dhënë në Polici, ai tha se nuk qëndron prapa asaj deklarate, pasi ajo deklaratë është dhënë në marrëveshje me Naim Murselin dhe nën presion të Policisë.

Plava ka mohuar që e ka vrarë Liridona Ademaj, për çka tha se nuk e di se kush është personi që do ta kryente vrasjen e të ndjerës.

Ai tha se me të akuzuarin tjetër, Naim Murseli, ishte takuar 7-8 herë para ditës kritike.

Sipas Plavës, dy ditë para ngjarjes kritike janë takuar me Naim Murselin, i cili e kishte telefonuar dhe i kishte kërkuar të takohen. Ai tha se iniciativa për t’u takuar me Naim Murselin gjithmonë ka qenë e këtij të fundit, dhe asnjëherë e tij.

Tutje, Plava tha se në marrëveshjen me Naim Murselin i ishin premtuar si dhuratë edhe 250 mijë euro, pasi të dalë nga burgu.

Por, ai shtoi se tani e di se Behxhet Pacolli nuk ka qenë fare i përfshirë në këtë rast.

Plava dha detaje edhe për blerjen e armës, për çka tha se fillimisht e provoi Naim Murseli, e më pas edhe vetë ai. Ai tha se deri në momentin kritik armën e ka mbajtur Naimi. Ndërsa përshkroi ngjarjen se si kishte shkuar në Etno Kuça dhe udhëzimet që i kishte marrë nga Naim Murseli paraprakisht.

Pas ishin larguar nga restoranti ku kishte darkuar Naim Murseli me familjen e tij, Plava tha se ishte nisur për Gjakovë, por pas 10 minutash e kishte thirrur Murselin duke e pyetur se ku ishte dhe më pas i kishte dërguar lokacionin e vendit të ngjarjes.

Ai tha se e kishte dëgjuar krismën e armës dhe se Naim Murseli ia kishte dhënë armën atij duke i thënë të ikte.

Pas kësaj deklarate, i akuzuari Granit Plava tha se do të mbrohet në heshtje, duke mos dashur t’u përgjigjet pyetjeve të prokurores dhe palëve të tjera.

Seanca për vrasjen e Liridona Ademajt do të vazhdojë edhe nesër nga ora 09:30.

Liridona Ademaj është vrarë më 29 nëntor 2023, në orën 20:25, në rrugën “Dalip Alshiqi” në Prishtinë dhe fillimisht rasti ishte raportuar si vrasje gjatë grabitjes.

/Kosovapress/