Ka përfunduar intervistimi i prokurorisë për dëshmitarin e pestë në gjykimin kundër Pjetër Shalës. Pas përfundimit të intervistimit edhe nga ana e mbrojtjes së viktimave, të nesërmen do të përgjigjet në pyetjet e ekipit mbrojtës. Dëshmitari që mban numrin 10, gjatë ditës ka folur për shtabin e logjistikës në Kukës. Pjetër Shala e ka ndjekur këtë seancë nga qendra e paraburgimit, përmes video-lidhjes.
Dëshmitarit të pestë të Zyrës së Prokurorit të Specializuar (ZPS) i janë bërë disa pyetje në seancë private për të vazhduar pastaj të përgjigjet në pyetjet e prokurorisë.
Tutje, dëshmitari ka treguar se si ka ikur nga ky shtab në drejtim të Kalimashit.
E derisa është përgjigjur në pyetjet e mbrojtësit të viktimave, dëshmitari me numrin 10 pretendonte se Pjetër Shala ‘hynte e dilte pa pyetur askënd’.
Gjatë kësaj seance, Pjetër Shala ka kërkuar që t’i lejohet kohë për konsultim me avokatët e tij. Seanca me dëgjimin e dëshmitarit nga ana e mbrojtjes do të vijojë ditën e nesërme.
Pjetër Shala po qëndron në Hagë prej marsit të vitit 2021.
Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.
