Përfundimi i numërimit të votave të kandidatëve për deputetë për zgjedhjet parlamentare të 9 shkurtit pritet të merr kohë deri në dy javë.

Kështu ka thënë kryetari  i KQZ-së, Kreshnik Radoniqi, i cili shtoi se në të njëjtën periudhë kohore do të bëhet edhe vlerësimi i pakove me fletëvotime nga diaspora.

KQZ sot në mbledhjen e radhës njoftoi për anulimin e 529 zarfeve me fletëvotime nga diaspora për shkak të parregullsive. Ndërkaq, u theksua se numërimi i votave për kandidatët për deputetë në qendrat komunale të numërimit ka nisur në 18 komuna, ndërkaq në tetë të tjera do të nisë sot.

Kryetari i KQZ-së, Kreshnik Radoniqi, tha se meqenëse s’ka nisur me kohë numërimi në të gjitha qendrat komunale ky proces pritet të përmbyllet brenda dhjetë dite apo maksimumi dy javë.

Ai foli edhe për “sulmin apo ndërhyrjen” në sistemin e KQZ-së, ku tha se kjo çështje është në duart e prokurorisë dhe policisë, dhe sapo të marrin raportin nga këto dy institucione do të dalin me qëndrim.

Drejtori i Zyrës për Regjistrim, Certifikim dhe Kontrollin Financiar të Partive Politike, Besnik Buzhala, tha se vonesat në numërimin e votave për kandidatët për deputetë në qendrat komunale po ndodh për shkaqe teknike.

Krahas kësaj, Buzhala bëri të ditur se KQZ-ja ka anuluar 529 zarfe me fletëvotime nga diaspora për shkak, siç u tha, parregullsive të shfaqura.

Në lidhje me këto të dhëna reaguan anëtarët e KQZ-së nga partitë politike, ku anëtari i PDK-së, Arianit Elshani, tha se KQZ-ja duhet të fillojë nga sot publikimin e rezultateve të kandidatëve për deputetë.

Anëtari i KQZ-së nga LDK-ja, Sami Hamiti, kërkoi nga sekretariati të ketë një plan B për numërimin e votave të kandidatëve për deputetë në rast se bie sërish sistemi elektronik.

Mirëpo, anëtari i KQZ-së nga radhët e LVV-së, Alban Krasniqi, tha se procesi i numërimit të votave po shkon mirë. Ai tha se një pjesë e kritikave për vonesa është tërësisht i gabuar.

Lajmi i plotë në sistemin me parapagim.