Partia Demokratike e Kosovës kërkon ulje të menjëhershme të taksave për derivatet e naftës dhe masa tjera konkrete në mbrojtje te bujqve dhe prodhuesve vendorë.

Deputeti i Partisë Demokratike të Kosovës, Arben Mustafa në një konferencë për medie tha se Kosova ka hyrë në një valë të re dhe të ashpër të rritjes se çmimeve.

Ai tha se në situata të tilla qytetari dhe prodhuesit vendorë kanë nevojë për dorën e shtetit.

“Ajo dorë e shtetit, po shihet, ata që sot e qeverisin Kosovën janë ata edhe te vitit 2022 kur lejuan që vala e inflacionit të ndodhë lirshëm dhe këtë po e bëjnë sot duke qëndruar si spektatorë”, tha ai.

Mustafa kërkoi masa konkrete në këtë drejtim.

“Masa konkrete dhe të drejtpërdrejta për mbrojtjen e bujqve dhe prodhuesve vendorë, përfshirë subvencione shtesë dhe mbështetje për inputet bazë në këtë sezon kritik. Një plan emergjent, të qartë dhe të matshëm, për përballimin e rritjes së çmimeve, që garanton stabilitet për familjet dhe bizneset”, bëri thirrje Mustafa.

Mustafa tutje tha se qeveria nuk e ka opsion largimin e taksës për naftën.

/Kosovapress/