Partia Demokratike e Kosovës ka mbajtur një tubim zgjedhor në komunën e Skenderajt, ku morën pjesë drejtues të lartë të partisë, kandidatë për deputetë, familjarë të dëshmorëve, veteranë, invalidë të luftës dhe qytetarë të shumtë.

Kandidati i PDK-së për kryeministër, Bedri Hamza, gjatë fjalimit të tij vlerësoi rolin historik të Drenicës në rrugëtimin e Kosovës drejt lirisë dhe pavarësisë, duke e cilësuar këtë rajon si simbol të sakrificës dhe patriotizmit shqiptar.

“...Takoj rininë, e cila është buzë situatës me humb shpresën. Pra, Kosova është në krizë dhe kjo krizë e ka një adresë. Adresë është kryeministri aktual, Albin Kurti, dhe qeveria e Vetëvendosjes. Se gjashtë vjet polarizime, drama, kriza, sulme, e sulmon Drenicën, i sulmon opozitën, i sulmon mediat, i sulmon bizneset, i sulmon partnerët tanë strategjikë”, u shpreh Hamza.

Ai theksoi se Kosova ka nevojë për stabilitet, zhvillim ekonomik dhe lidership me rezultate konkrete, duke premtuar mbështetje për bizneset, krijim të vendeve të reja të punës dhe rritje të buxhetit të shtetit.

Gjatë tubimit, Hamza prezantoi edhe zotimet e tij programore për sektorin publik, familjet e dëshmorëve, veteranët, shëndetësinë dhe arsimin.

Hamza: Me Partinë Demokratike të Kosovës 50% do të rriten pagat

“E kur të rritet buxheti i Kosovës, po, me Partinë Demokratike të Kosovës 50% do të rriten pagat për të gjithë të punësuarit në sektorin publik në Kosovë: edhe për mësuesit, edhe për arsimtarët, edhe për profesorët, edhe për policët, edhe për zjarrfikësit, edhe për personelin shëndetësor, edhe për të gjithë ata që marrin paga përmes buxhetit të Kosovës”, tha Hamza.

Në pjesën tjetër të fjalimit, kandidati i PDK-së kritikoi qeverinë aktuale për, sipas tij, mungesën e realizimit të projekteve infrastrukturore dhe investimeve strategjike në vend, duke përmendur një sërë projektesh rrugore dhe energjetike që ende nuk kanë përfunduar.

Tubimit iu drejtua edhe kryetari i Komunës së Skenderajt, Sami Lushtaku, i cili shprehu mbështetjen e tij për kandidaturën e Bedri Hamzës për kryeministër.

Lushtaku: Vota për PDK-në, është votë për Hashim Thacin, Kadri Veselin, Jakup Krasniqin

“Vota për Partinë Demokratike është votë për Hashim Thaçin, Kadri Veselin, Jakup Krasniqin”, u shpreh Lushtaku.

Sot, është dita e katërt e fushatës zgjedhore. Zgjedhjet mbahen më 7 qershor.

/Kosovapress/