Partia Demokratike e Kosovës (PDK), në seancën e sotme (e mërkurë) të Kuvendit të Kosovës, kërkoi shkarkimin e ministres së Industrisë, Rozeta Hajdari, pas dënimit për mosdeklarim të pasurisë.

Shefi i grupit parlamentar të PDK-së, Abelard Tahiri tha se Hajdari është ministrja e parë në detyrë që është dënuar pasi nuk ka deklaruar pasurinë. Ai fajësoi edhe mazhorancën për pikat e prapambetura nga viti i kaluar të Kuvendit, të cilat po shqyrtohen sot (e mërkurë).

“Sa i përket efikasitetit të këtij Kuvendi pra të kësaj mazhoarence më së miri flet ky rend dite ku sot po e fillojmë sesionin pranveror me seancën e 15 shtatorit që ka qenë seanca e parë e sesionit vjeshtor kemi me dhjetëra pika të pa përmbyllura në kuadër të agjendës legjislative si pasojë e mosfunksionimit të duhur të kësaj mazhorance të drejtuar nga LVV. Ndërsa, sa i përket shqyrtimit të këtij projektligji, pra për sigurinë e përgjithshme të produkteve, projektligj mjaftë i rëndësishëm që prezantohet nga një ministre e cila tashmë me vendim të gjyqësorit është e dënuar për fshehje të pasurisë apo mos deklarim të pasurisë por rrjedhimisht një politikë të tillë e bënë mjaftë të lëndueshme dhe cenueshme prezantimi i saj nga një ministre që ka vendim të gjyqësorit... Për ne është e papranueshme që të vazhdojë të qëndrojë dhe të ushtrojë pozicionin e ministres një person që fsheh pasurinë. Dhe rrjedhimisht po ua përkujtoj se ministrja Hajdari është ministrja e parë në Kosovë që mban Qeveria Kurti që është në detyrë dhe nuk e ka deklaruar pasurinë, asnjëherë në Kuvendin e Kosovës nuk ka pas ministër që ka qëndruar në detyrë që është i dënuar për mos deklarim të pasurisë, këtë standard po e vendos fatkeqësisht Qeveria Kurti”, tha ajo.

Tahiri kërkoi nga kryeministri Kurti që të shkarkojë ministren e Tregtisë, Rozeta Hajdari.

“A nuk janë të mjaftueshme të gjitha këto skandale për të gjithë neve, për kryeministrin Kurti, për këtë mazhorancë që kjo ministre të dorëhiqet dhe të shkarkohet prandaj është e papranueshme dhe fyerje për të gjithë ne, është fyerje për Kosovën dhe ky është standard që po e vendosni ju… Ju kërkoj të gjithë juve që të bëni presion tek kryeministri, të bëni presion që kjo ministre të shkarkohet sepse është ofendim për gjithë qytetarët e Kosovës”, tha ai.

Pas fjalimit të Tahirit, reagoi shefja e grupit parlamentar të Lëvizjes Vetëvendosje, Mimoza Kusari-Lila, e cila tha se nëse ka mungesë të efikasitet të Kuvendit, atëherë përgjegjësia është e të gjithë deputetëve.

“Konsideroj se seriozitetin, përkushtimin dhe angazhimin tonë për mandatet që i kemi marr në trajtim të projektligjeve dhe përmirësim të jetës së qytetarëve të Kosovës mund ta bëjmë me kontributin e drejtpërdrejtë në përmbajtje të këtyre projektligjeve të mos e ndryshojmë agjendën me të cilën jemi ftuar, agjendën të cilën bashkërisht e kemi votuar në kryesi (të Kuvendit). Ju sugjeroj dhe miqësisht ju rekomandoj si kolegë deputetet që të mbesim në kuadër të agjendës së miratuar dhe gjitha temat që kanë trajtimin në ditën e sotme të mbesim në kuadër të seriozitetit dhe rëndësisë që paraqesin”, tha ajo.

Më pas, reagoi përsëri Tahiri, i cili tha se si subjekt politik nuk do të përkrahin asnjë iniciativë që vjen në Kuvendi nga ministrja Hajdari.

“Është shumë e rëndësishme që kjo ministre të jap dorëheqje apo të shkarkohet ju po e vendosni një standard shumë të dëmshëm…Ne si grup parlamentar asnjë iniciativë, asnjë marrëveshje që vjen nga kjo ministri, derisa drejtohet nga Rozeta Hajdari ne nuk do ta votojmë, qofshin marrëveshje ndërkombëtare ligje apo çka do që vjen nga kjo ministreje sepse nuk është e denjë për të vazhduar tutje ushtrimin e pozitës së ministres”, tha ai.

Deputeti i LVV-së, Adnan Rrustemi tha se me një çështje teknike rreth deklarimit të pasurisë së Hajdarit po tentohet të bëhet politikë.

“Mos të përpiqet kryetari i grupit parlamentar të PDK një çështje krejtësisht teknike dhe madje ligjërisht edhe të ndryshuar nga ky Kuvend ta bëjë çështje politike sepse nuk qëndron”, tha ai.

Mirëpo, Tahiri insistoi se me Hajdarin në krye po cenohet integriteti i institucionit të Ministrisë së Tregtisë.

“Nuk mund ta relativizioni deri në atë masë një dënim të tillë për mos deklarim të pasurisë, është vepër penale që është marr nga shkalla e parë nga Gjykata Themelore e Prishtinës, prandaj vazhdimi i punës së kësaj ministre e cenon integritetin e kësaj ministrie, kjo tashmë e ka integritetin e cenueshëm”, tha ai.

Deputetja e PDK-së, Blerta Deliu-Kodra tha se kjo qeveri ka ardhur në pushtet me premtimin se do jetë e pastër dhe pa afera korruptive.

“Sot kur kemi një vendim për dënimin e zonjës Hajdari, nuk e kuptoj se si zonja Hajdari ka guximin të vijë e të flas para parlamentit e të mos shkarkohet e dorëhiqet moralisht, është më e pakta që mund ta bëjë një qeveri e cila ka ardhur në pushtet me premtimet më të mëdha që do të jetë qeveria më e pastër që nuk do të ketë korrupsion e afera korruptive... Zonja Hajdari nuk është e denjë sot që të vijë e të flasë para qytetarëve të Kosovë për çfarëdo iniciative, më e pakta që duhet të bëjë kryeministri është që ta shkarkojë dhe po të flas hapur sepse ne çdo ditë po shohim ndryshim qëndrimesh të kryeministrit Kurti”, tha Deliu-Kodra.

Ministrja e Industrisë, Ndërmarrësisë dhe Tregtisë, Rozeta Hajdari u shpreh se Projektligji për Sigurinë e Përgjithshme të Produkteve siguron vendosjen e produkteve të sigurta në treg.

“Ligji i ri do të zbatohet për të gjitha produktet siguria e të cilave nuk rregullohet me rregullore të veçanta duke krijuar kështu një bazë ligjore funksionale për sigurinë e përgjithshme të produkteve. Sa i përket sigurisë së produkteve arsye kryesore për rregullimin e kësaj fushe përmes këtij ligji sigurimi i një nivel më të lartë të mbrojtjes të shëndetit dhe konsumatorëve që përdorin produktet si dhe përdoruesit të tjerë që përdorin produktet për nevojat në kryerje të veprimtarive profesionale. Do të siguroj vendosjen në treg të produkteve ekskulizivisht të sigurta dhe do të parandaloj prodhimin, importimin dhe vendosjen në treg të produkteve mashtruese dhe eksportimin e tyre”, tha ajo.

Deputetja e LDK-së, Valentina Bunjaku tha se projektlgji për sigurinë e përgjithshme të produkteve është i arsyeshëm.

“Ne si LDK e kemi shqyrtuar në Komisionin për Ekonomi dhe ky projektligj  arsyeshëm dhe është në të mirë të qytetarëve tanë“, tha ajo.

Deputeti i AAK-së, Pal Lekaj tha se ky ligj është i vonuar dhe i mirëseardhur por kjo qeveri nuk e ka fokusin te qytetarët.

“Nëse ka qenë interesi i qytetarëve ju i keni si mazhorancë numrat dhe po në këtë parlament i keni parë se keni kthyer deputetët edhe nga udhëtimi për të miratuar ligje që kanë shkruar në favor të qeverisë dhe sot pas 3-4 muaj debatojmë për një ligj të veçantë që shkon në favor të qytetarëve. Dhe ajo që më bënë me kuptua kur jemi tek siguria e produkteve nëse kthehemi nga importi dhe shikojmë Serbia zënë vendin e 6 të importin dhe ko të jep me kuptua se po nga kjo qeveri ka dal që të mos përdoren produktet serbe në Kosovës dhe po kjo qeveri bukur ka qenë e zhurmshme që ne import kemi më shumë nga Shqipëria sesa nga Serbia dhe kjo po e dëshmon të kundërtën”, tha ai.

E pas këtij debati, ku PDK kërkoi shkarkimin e vetë ministres së Tregtisë, Rozeta Hajdari me Projektligji për Sigurinë e Përgjithshme të Produkteve kaloi me 61 vota. /B.Ibishi/