Kryetari i Partisë për Veprim Demokratik, Shaip Kamberi, ka njoftuar se ka përfunduar procesi i brendshëm i përzgjedhjes së kandidatëve për zgjedhjet lokale të përcaktuara për 2 qershor.

Sipas Kamberit ky proces ka pasur një rëndësi të veçantë për partinë, pasi sipas tij ka shërbyer si një rast për të dëshmuar qëndrimin e tyre ndaj demokracisë së brendshme dhe përpjekjet për të siguruar përfaqësimin më të mirë të komunitetit të tyre në nivelet lokale të qeverisjes.

“Për komunën e Preshevës, pas një vlerësimi të kujdesshëm të aftësive dhe angazhimeve të mundshme të kandidatëve, partia ka zgjedhur Ardita Sinanin për të kandiduar për kryetare  të komunës. Ardita Sinani është një figurë e njohur për angazhimin e saj në fushën e zhvillimit social, edukimit dhe përfaqësimit të interesave të qytetarëve në disa fusha të rëndësishme. Përfaqësimi i saj do të sjellë drejtim të ri dhe të energjishëm për të adresuar sfidat dhe të arriturat e komunës së Preshevës”, tha ai.

Në të njëjtën kohë, për komunën e Bujanocit, sipas Kamberit pas një procesi të ngjashëm të vlerësimit të kandidatëve, Partia për Veprim Demokratik ka vendosur që listës t’i prijë nga Ragmi Mustafi.

“Mustafi është një personalitet i njohur në  komunën e Bujanocit për angazhimin e tij të gjatë dhe të palodhur në shërbim të zhvillimit dhe përfaqësimit të interesave të qytetarëve të kësaj komune. Këto nominime janë reflektim i përkushtimit të Partisë për Veprim Demokratik në sigurimin e liderëve të përshtatshëm dhe të përkushtuar për të përfaqësuar dhe për të përmbushur synimet dhe aspiratat e qytetarëve në nivelet lokale të qeverisjes”, ka shkruar ai.

Sipas Kamberit me një fokus të vazhdueshëm në përmirësimin e kushteve jetësore dhe zhvillimin në tërësi, këto nominime sjellin një periudhë të re të arritjeve dhe përparimit për qytetarët e Preshevës dhe Bujanocit.