Papa Françesku ftoi besimtarët e krishterë në mbarë botën në një festë më modeste të Krishtlindjes këtë vit, në mënyrë që të ndihmonte ukrainasit me “gjeste konkrete mëshirë”.

“Është bukur të festosh Krishtlindjet dhe të bësh festime, por ju ftoj të ulni sadopak nivelin e shpenzimeve për Krishtlindje. Le të festojmë një Krishtlindje më modeste dhe të dërgojmë atë që kursejmë për qytetarët e Ukrainës që kanë nevojë për të”, tha Papa.

Papa Françesku ka kërkuar vazhdimisht dërgimin e ndihmës në Ukrainë që nga fillimi i luftës në Ukrainë.

Vatikani ka organizuar disa përpjekje humanitare për të ndihmuar Ukrainën, duke përfshirë një donacion veshjesh këtë muaj për t'u siguruar ukrainasve veshje të ngrohta termike për shkak të mungesës së ngrohjes dhe energjisë elektrike në vend të shkaktuar nga sulmet me raketa ruse në infrastrukturën ukrainase.