Numërimi mbrapsht për Sunny Hill Festival ka hyrë në ditët e fundit, ndërsa organizatorët kanë ndarë një tjetër informacion të rëndësishëm për të gjithë ata që planifikojnë të marrin pjesë në festival.

Përmes një njoftimi zyrtar, është bërë e ditur se edhe në këtë edicion vizitorët do të kenë në dispozicion autobusë falas, të cilët do të qarkullojnë gjatë ditëve të festivalit. Kjo nismë synon të lehtësojë qasjen në hapësirën ku zhvillohet eventi, si dhe të inkurajojë përdorimin e transportit publik.

Sipas organizatorëve, autobusët e Trafikut Urban do të nisin qarkullimin nga ora 11:40, ndërsa pas përfundimit të programit artistik, transporti i kthimit do të fillojë nga ora 01:30.

Festivali u bën thirrje të gjithë pjesëmarrësve të zgjedhin autobusët falas në vend të automjeteve private, duke ndihmuar në reduktimin e trafikut dhe në mbrojtjen e mjedisit gjatë ditëve të aktivitetit.

Me përgatitjet që po hyjnë në fazën përfundimtare dhe me publikimin e detajeve organizative, Sunny Hill pritet të mirëpresë edhe këtë vit mijëra vizitorë nga Kosova, rajoni dhe vende të ndryshme të botës. Edicioni i sivjetmë do të sjellë në skenë artistë të njohur vendorë dhe ndërkombëtarë, duke e shndërruar festivalin në një nga ngjarjet më të rëndësishme muzikore të verës.

Pjesëmarrësit këshillohen të organizojnë paraprakisht udhëtimin e tyre dhe të shfrytëzojnë transportin e ofruar, në mënyrë që përvoja në festival të jetë sa më e lehtë dhe e organizuar.

/Kosovapress/