Presidentja e Kosovës, Vjosa Osmani do t'i takojë sot përfaqësuesit e OVL UÇK-së.
Këtë e ka konfirmuar për KosovaPress, këshilltari për media, Bekim Kupina.
KosovaPress mëson nga burime të veta se ky takim pritet të ndodhë sot pasdite.
Kujtojmë se dje, kryetari i OVL-së Faton Klinaku ka bërë të ditur se i kanë kërkuar takim presidentes Osmani takim lidhur me Ligjin për pagën minimale.
Ai përmes një statusi në Facebook ka thënë se këtë kërkesë e kanë bërë për shkak të lënies jashtë të kësaj kategorie në këtë ligj.
“Organizatat e dala nga lufta e UÇK-së, sot i kanë dërguar kërkesë për takim zyrtar Presidentes së Republikës së Kosovës Dr. Vjosa Osmani Sadriu, lidhur me çështjen e miratimit nga Kuvendi i Kosovës, të ligjit për pagën minimale, me anë të të cilit janë përjashtuar veteranët e luftës së UÇK-së”, thuhet në njoftimin e tij.
Ndërkaq, të shtunën që lamë pas, në Prishtinë u mbajt një protestë në mbështetje të kësaj kërkese për veteranët.
