Presidentja e Kosovës, Vjosa Osmani, ka shprehur ngushëllime për familjet e tre bashkatdhetarëve që humbën jetën tragjikisht në vendin e punës në Austri.

Ajo tha se me dhimbje të thellë është pranuar lajmi për vdekjen e Pajtim Bajramit, Asllan Musliut dhe Istref Zekajt, si pasojë e një aksidenti të rëndë në një kantier ndërtimi në Vjenë.

“Kjo tragjedi e rëndë, që ua ndërpreu jetën teksa punonin për ta siguruar jetesën, ka lënë një dhimbje të thellë e të pashuar jo vetëm te familjet e tyre, por te të gjithë ne”, thuhet në një deklaratë të Osmanit për mediet.

Presidentja u ka shprehur ngushëllime familjeve, miqve dhe të afërmve të viktimave, duke theksuar se ndan dhimbjen me ta në këto momente të vështira.

Ajo gjithashtu është lutur që familjet të gjejnë forcë për ta përballuar këtë humbje të rëndë.

“I përhershëm qoftë kujtimi për Pajtim Bajramin, Asllan Musliun dhe Istref Zekajn”, thuhet në fund të mesazhit ngushëllues të Osmanit. /KosovaPress/

/Kosovapress/