Policia ka informuar se sot në rajonin e Mitrovicës veriore është duke realizuar një operacion antidrogë.

Lidhur me rezultatet apo detajet e këtij operacioni të antidrogës, Policia ka potencuar se do të njoftojë pas pranimit të raporteve apo informatave nga njësitet në terren.

“Policia e Kosovës, konkretisht Drejtoria për Hetimin e Trafikimit me Narkotikë në vazhdën e luftës për parandalimin dhe luftimin e rasteve të abuzimit me substanca narkotike, pas hetimeve intensive sot më 12.02.2023, në rajonin e Mitrovicës veri, është duke realizuar një operacion policor antidrogë, me mbështetjen edhe të njësive tjera relevante policore.”, është bërë e ditur në komunikatë.

Policia e Kosovës ka shtuar se në fushën e parandalimit, hetimit dhe zbulimit të trafikimit me narkotikë edhe gjatë vitit të kaluar ka ndërmarrë disa operacione të suksesshme policore. Sipas PK-së, gjatë vitit 2022 është konfiskuar sasi e konsiderueshme e substancave të dyshuara narkotike, janë zbuluar laboratorë droge, janë arrestuar numër i madh i personave të dyshuar, si dhe janë shpartalluar grupe të ndryshme kriminale në mbarë vendin.