OKB-ja apelon për më shumë ndihmë pas tërmetit në Mianmar
Më shumë se 1.700 persona kanë vdekur dhe rreth 3.400 janë plagosur pas një tërmeti me magnitudë 7.7 ballë që goditi Mandalayn - qytetin e dytë më të madh të Mianmarit të premten.
Agjencitë ndërkombëtare kanë dërguar ekipe ndihme dhe shpëtimi në vendin e Azisë Juglindore, shkruan BBC.
Familjarët po presin me ankth ndërsa përpjekjet e shpëtimit janë duke u zhvilluar në Mianmar dhe në Tajlandën fqinje.
Në Bangkok rreth 1.000 km larg nga epiqendra, 76 punëtorë ndërtimi mbeten të bllokuar në rrënojat e një ndërtese të lartë.
Organizata Botërorë e Shëndetësisë ka bërë një apel urgjent për 8 milion dollarë në ndihmë për përgjigjen e saj ndaj tërmetit në Mianmar, transmeton
KosovaPress.
Agjencia e OKB-së tha se po përgjigjet në "nivelin më të lartë të aktivizimit të urgjencës" dhe nevojiten donacione për "të ofruar kujdes, për të parandaluar shpërthimet e sëmundjeve dhe për të rivendosur shërbimet thelbësore shëndetësore gjatë 30 ditëve të ardhshme".
Rrugët e dëmtuara, rrjetet e dobëta të komunikimit dhe një luftë civile katërvjeçare kanë penguar përpjekjet e kërkim-shpëtimit pas tërmetit që goditi të premten Mianmarin dhe vendet fqinje.
