Sulmuesi brazilian Neymar ka reaguar ashpër ndaj arbitrave gjatë humbjes 3:0 të Santosit ndaj Coxa-s, pasi u zëvendësua gabimisht për shkak të një lëshimi në procedurën e zëvendësimit.

Sipas raportimeve, Santos kishte vendosur ta largonte nga loja Gonzalo Escobarin dhe në fushë të hynte Robinho Jr, por zyrtarët e ndeshjes ngritën gabimisht numrin 10 të Neymarit. Braziliani ishte jashtë fushës duke marrë trajtim mjekësor në ato momente dhe, kur kuptoi situatën, tentoi të rikthehej në lojë, por u ndëshkua me karton të verdhë.

I irrituar nga vendimi, Neymar mori fletën zyrtare të zëvendësimit dhe ua tregoi arbitrave dhe kamerave televizive, duke insistuar se ishte bërë gabim. Incidenti vjen vetëm një ditë para publikimit të listës përfundimtare të Brazilit për Kupën e Botës nga trajneri Carlo Ancelotti.

34-vjeçari ishte lënë jashtë skuadrës në mars, por javën e kaluar u përfshi në listën paraprake me 55 futbollistë. Ancelotti deklaroi se vendimi për Neymarin nuk është i lehtë, duke theksuar se lojtari “ka pasur probleme, por po punon fort për t’u rikuperuar dhe ka përmirësuar formën së fundmi”.

Ndërkohë, presidenti i Brazilit, Luiz Inácio Lula da Silva, zbuloi se kishte biseduar me Ancelottin për Neymarin. “Nëse është fizikisht gati, ai e ka futbollin. Ajo që duhet të di është nëse ai e dëshiron vërtet”, tha Lula.

KosovaPress