Në ambientet e Korporatës Energjetike të Kosovës, pikërisht në Termocentralin “Kosova B”, është mbajtur ceremonia zyrtare e nënshkrimit të kontratës për ndërtimin e pesë impianteve për trajtimin e ujërave të ndotura dhe një objekti për magazinimin e kimikateve.

Ky projekt realizohet në kuadër të iniciativës “Përmirësimi i cilësisë së ujit të lumit Sitnica përmes ndërtimit të impianteve të trajtimit të ujërave të ndotura në TC ‘Kosova B’’.

Projekti parasheh ndërtimin e një sistemi të integruar, i cili përfshin pesë impiante për trajtimin e ujërave të ndotura dhe një objekt për magazinimin e kimikateve, të dizajnuar për operim të sigurt, të qëndrueshëm dhe afatgjatë.

Me këtë rast, ministrja e Ekonomisë, Artane Rizvanolli, theksoi rëndësinë e projektit për mbrojtjen e mjedisit dhe zhvillimin e qëndrueshëm në vend.

“Ky projekt përputhet plotësisht me prioritetet tona sektoriale për forcimin e infrastrukturës energjetike publike si një shtyllë kyçe e sigurisë së furnizimit me energji. Prioriteti ynë nuk ka qenë vetëm ruajtja e kapaciteteve gjeneruese, por përmirësimi i tyre duke i bërë më të besueshme, më efiçiente dhe në përputhje me standardet mjedisore”, tha ajo.

Në ceremoni morën pjesë edhe përfaqësues të institucioneve vendore dhe ndërkombëtare, përfshirë ministren e Mjedisit dhe Planifikimit Hapësinor, Fitore Pacolli, shefin e Bashkëpunimit në Bashkimi Evropian, Hubert Perr si dhe përfaqësues të KEK-ut dhe UNOPS-it.

Gjatë aktivitetit u prezantuan objektivat dhe rezultatet e pritshme të projektit, të cilat përfshijnë krijimin e një sistemi më të avancuar për menaxhimin e ujërave të ndotura, duke trajtuar kategori të ndryshme si ujërat industriale, ujërat me përmbajtje vajrash, ujërat e ndikuara nga kimikatet, rrjedhjet nga zonat e depozitimit të qymyrit, ujërat atmosferike dhe ato sanitare.

Projekti, me vlerë rreth 12 milionë euro, financohet nga Bashkimi Evropian dhe zbatohet nga UNOPS, në bashkëpunim me institucionet vendore, përfshirë Ministrinë e Ekonomisë, Ministrinë e Mjedisit dhe Planifikimit Hapësinor, si dhe Korporatën Energjetike të Kosovës.

/Kosovapress/