Ndërpritet operimi i Impiantit për Trajtim i Ujit të Pijes në Mitrovicë
Dëgjoje me zë...
Ndërpritet operimi i Impiantit për Trajtim i Ujit të Pijes në Mitrovicë
Rritja e nivelit të turbullirave në burimet e ujit kanë shkaktuar ndërprerjen e përkohshme të operimit të Impiantit për Trajtimin e Ujit të Pijes, ka njoftuar Kompania Rajonale e Ujësjellësit “Mitrovica”.
Sipas njoftimit të KRU “Mitrovica” kushtet teknike e kanë bërë të pamundur trajtimin dhe shpërndarjen e ujit sipas standardeve të sigurisë dhe cilësisë së ujit të pijes, shkruan KosovaPress.
“Ju njoftojmë se, si pasojë e rritjes së nivelit të lartë të turbiditetit (turbullirës) në burimet e ujit, është bërë ndërprerja e përkohshme e operimit të Impiantit për Trajtimin e Ujit të Pijes.
Këto kushte teknike e bëjnë të pamundur trajtimin dhe shpërndarjen e ujit sipas standardeve të sigurisë dhe cilësisë së ujit të pijes. Ekipet tona teknike janë në monitorim të vazhdueshëm të situatës dhe do të rifillojnë operimin e impiantit menjëherë pas normalizimit të nivelit të turbiditetit.
KRU 'Mitrovica' Sh.A. do t’ju mbajë të informuar në kohë reale për çdo zhvillim apo risi lidhur me gjendjen e furnizimit me ujë”, thuhet në njoftimin e KRU “Mitrovica”.
Qyteti i Mitrovicës tash e disa ditë është duke u përballur me vërshime dhe më pas edhe telashe me ujin e pijes, për shkak të reshjeve të dendura që ranë ditëve të fundit në vend.
Përveç Mitrovicës, qytetet tjera të prekura nga vërshimet janë edhe Gjakova, Drenasi, Malisheva, Juniku, Rahoveci, Klina, Vushtrria, Skenderaj.
/Kosovapress/
Lajmi i plotë ëshë në sistemin me parapagim.
Abonohu për ti shfryëzuar shërbimet KosovaPress-it.
